ایوب آفریدی کے اثاثوں سے متعلق اہم انکشاف

🗓️ 23 دسمبر 2021

اسلام آباد (سچ خبریں) وزیراعظم کے مشیر ایوب آفریدی  کے اثاثوں سے متعلق اہم انکشاف  ہوا ہے ان کے اندرون، بیرون ملک کروڑوں کے اثاثے موجود ہونے کا انکشاف ہوا ہے۔ ایوب آفریدی نے بحریہ ٹائون لاہور میں گھر کی مالیت 24 کروڑ 23 لاکھ 39 ہزار روپے ظاہر کی ہے۔

تفصیلات کے مطابق وزیر اعظم عمران خان کے مشیر بر ائے اوورسیز پاکستانیز ڈویژن ایوب آفریدی نے اندرون اور بیرون ملک موجود اپنے تمام اثاثے ڈیکلیئر کردیے ہیں ۔ اس حوالے سے کابینہ ڈویژن کے ذرائع کے مطابق ایوب آفریدی نے بحریہ ٹائون لاہور میں گھر کی مالیت 24 کروڑ 23 لاکھ 39 ہزار روپے ظاہر کی ہے۔

گلبرگ گرین اسلام آباد میں پلاٹ کی مالیت 11 کروڑ 49 لاکھ 50 ہزار روپے ، دبئی میں گھر کی مالیت 2 کروڑ 53 لاکھ 30 ہزار روپے ، اجمان میں کمرشل جائیداد کی مالیت 3 کروڑ 48 لاکھ 62 ہزار روپے، شا رجہ میں ملٹی گیٹ کارپوریشن ایف زیڈ ای کی مالیت 3 کروڑ 38 لاکھ 94 ہزار روپے،برطانیہ میں اہلیہ کے نام پر 16 کروڑ 59 لاکھ 20 ہزار روپے کی سرمایہ کاری ظاہر کی گئی۔

اس کے علاوہ ایوب آفریدی کی جانب سے اسٹاک ایکسچینج میں 31 لاکھ 17 ہزار 500 روپے کی سرمایہ کاری، ڈی بینچرز میں 23 لاکھ 40 ہزار روپے کی سرمایہ کاری ، 14 لاکھ 28 ہزار روپے سے زائد کا کیش ظاہر کیا گیا ہے ۔ یہی نہیں، مختلف بینکوں کے اکاؤنٹس میں 57 لاکھ روپے سے زائد کی رقم ظاہر کی گئی۔پشاور میں 28مرلے کی وراثتی جا ئیداد میں پانچ فیصد شیئر ہے۔30مرلہ جا ئیداد میں دس فیصد شیئر ہے۔

میڈیا رپورٹس کے مطابق ایوب آفریدی کی پشاور میں چار پراپرٹیز وراثتی ہیں ۔پونے آٹھ مرلہ جا ئیداد میں پانچ فیصد شیئر ہے۔16مرلہ پلاز ہ میں 11فی صد شیئر ہے۔ ایوب آفریدی کے پاس کسی اور ملک کی شہریت نہیں ہے ۔ یاد رہے کہ ایوب آفریدی کو گذشتہ ماہ 23 نومبر کو مشیر سمندر پار پاکستانیز و انسانی وسائل ترقی تعینات کیا گیا تھا۔ ایوب آفریدی نے شوکت ترین کے لیے سینٹ کی نشست خالی کی تھی۔