لاکھوں بے گناہ افراد کے قتل عام پر خاموش رہنے والے امریکی صدر اپنے کتے کی موت پر شدید غمزدہ ہوگئے

🗓️ 23 جون 2021

واشنگٹن (سچ خبریں)  فلسطین، یمن، افغانستان اور دوسرے متعدد ممالک میں دہشت گردوں کی حمایت کرنے والے امریکی صدر ان بے گناہ افراد کے قتل عام پر ایک بھی لفظ بولنا گوارا نہیں کرتے لیکن اچانک سے ایک کتے کی موت پر اتنا غمزدہ ہوگئے کہ اپنے ٹوئٹ میں کتے کو خراج عقیدت پیش کردیا۔

تفصیلات کے مطابق وائٹ ہاؤس میں امریکی صدر جو بائیڈن کا عزیز ترین پالتو کتا چیمپ 13 برس کی عمر میں موت کے منہ میں چلا گیا جس کے باعث امریکی صدر بائیڈن شدید غم اور صدمے کا شکار ہو گئے ہیں۔

چیمپ نامی جرمن شیفرڈ سال 2008 سے جو بائیڈن کے ساتھ تھا، اس حوالے سے امریکی صدر جو بائیڈن کے آفیشل ٹوئٹر اکاؤنٹ پر چیمپ کو خراج عقیدت پیش کرتے ہوئے ایک پیغام شیئر کیا گیا ہے، جوبائیڈن نے اپنے ٹوئٹ میں کہا کہ ہماری فیملی نے ایک پیار کرنے والے چیمپئن کو خیرباد کہ دیا ہے، میں اسے بہت یاد کروں گا۔

بیان میں کہا گیا کہ چیمپ سے امریکی صدر کو جذباتی لگاؤ تھا جس کی یوں اچانک موت نے انہیں شدید غم میں مبتلا کردیا ہے۔

امریکی صدر جو بائیڈن کی اہلیہ ڈاکٹر جِل بائیڈن نے بھی کتے کے مرنے پر گہرے دُکھ کا اظہار کرتے ہوئے ایک پوسٹ ٹوئٹر کی زینت بنائی ہے۔

واضح رہے کہ اس سے قبل صدر ڈونلڈ ٹرمپ کے چار سالہ دور میں وائٹ ہاؤس میں‌ کوئی کتا یا دوسرا پالتو جانور نہیں رکھا گیا تاہم جو بائیڈن کی آمد کے ساتھ ہی وائٹ ہاؤس میں کتوں کی بھی واپسی ہوئی تھی۔