صہیونی دشمن نے امریکہ کے ساتھ مل کر جنایتِ قرن انجام دی ہے: سید عبدالملک بدرالدین الحوثی

صہیونی دشمن نے امریکہ کے ساتھ مل کر جنایتِ قرن انجام دی ہے: سید عبدالملک بدرالدین الحوثی

انصاراللہ یمن کے سربراہ سید عبدالملک بدرالدین الحوثی نے کہا ہے کہ اسرائیل، امریکی پشت پناہی کے ساتھ فلسطینی عوام کے خلاف بدترین مظالم ڈھا رہا ہے اور روزانہ مسجد الاقصیٰ کی بے حرمتی کر کے جنایتِ قرن کا ارتکاب کر رہا ہے۔

انہوں نے جمعرات کے روز میلاد النبی ﷺ کے موقع پر خطاب کرتے ہوئے پوری امت مسلمہ کو مبارک باد پیش کی اور کہا کہ یہ دن یمن میں جس انداز سے منایا جاتا ہے وہ دنیا بھر میں بے مثال ہے۔

الحوثی نے کہا کہ یمنی عوام نے اپنی ایمانی شناخت کے ذریعے آزادی اور استقامت کا راستہ اپنایا ہے اور آج اسلام کے پرچم کو سربلند رکھتے ہوئے آگے بڑھ رہے ہیں۔

انہوں نے نشاندہی کی کہ تین برس سے اسرائیل اور امریکہ کی سرپرستی میں غزہ پر ظلم و ستم جاری ہے، حتیٰ کہ فلسطینی عوام کو بنیادی ضروریات، بشمول بچوں کے لیے دودھ پاؤڈر تک سے محروم کیا جا رہا ہے۔

انصاراللہ کے سربراہ نے بعض عرب حکمرانوں کی بے حسی پر تنقید کرتے ہوئے کہا کہ کچھ تو فلسطین کے مسئلے سے لاتعلق ہیں اور کچھ براہ راست صہیونی دشمن کے ساتھ شریکِ جرم ہیں۔ ان کے مطابق، صہیونی طاقتیں صرف فلسطین تک محدود نہیں رہیں گی بلکہ وہ بڑے اسرائیل کے منصوبے کے تحت پورے خطے کو تبدیل کرنا چاہتی ہیں۔

الحوثی نے امت مسلمہ سے اپیل کی کہ قرآن اور سیرتِ رسول ﷺ کی طرف لوٹیں، اپنی ذمہ داریوں کا احساس کریں اور صہیونی سازشوں کو ناکام بنانے کے لیے متحد ہوں۔ ان کا کہنا تھا کہ اسلام شکست کا نہیں بلکہ فتح کا پیغام ہے، اور تاریخ گواہ ہے کہ اسلام دشمن قوتیں ہمیشہ ناکام رہی ہیں۔

انہوں نے اپنے خطاب کے اختتام پر فلسطینی عوام کی بھرپور حمایت کا اعادہ کیا اور کہا کہ ہم اپنے مؤقف پر قائم ہیں اور تمام باحوصلہ افراد سے اپیل کرتے ہیں کہ فلسطینی عوام کے خلاف صہیونی دشمن کی نسل کشی اور محاصرے کو روکنے کے لیے کردار ادا کریں۔