گولان کی مقبوضہ پہاڑیوں میں اسرائیلی فوج کا نیا تربیتی اڈہ قائم

گولان کی مقبوضہ پہاڑیوں میں اسرائیلی فوج کا نیا تربیتی اڈہ قائم

اسرائیلی فوج نے گولان کی مقبوضہ پہاڑیوں میں ایک نیا فوجی تربیتی مرکز قائم کیا ہے جو جنوبی لبنان کے شہری علاقوں سے مشابہت رکھتا ہے۔ اس اقدام کا مقصد حزب اللہ کے ساتھ ممکنہ جھڑپوں کی تیاری بتایا جارہا ہے۔

ترکی کی رپورٹ کے مطابق، اتوار کے روز اسرائیلی فوج نے اس اڈے کا افتتاح کیا ۔ یہ مرکز ایک منزلہ گھروں، چار منزلہ عمارتوں، تنگ گلیوں اور زیر زمین سرنگوں پر مشتمل ہے۔ بعض حصے جان بوجھ کر ملبے میں تبدیل کیے گئے ہیں تاکہ فوجی حقیقی جنگی حالات کی مشق کر سکیں۔

اسرائیلی فوجی حکام کا کہنا ہے کہ یہ اڈہ چھوٹے پیمانے پر پیادہ فوجی کارروائیوں سے لے کر بڑے فوجی آپریشنز تک مختلف قسم کی مشقوں کے لیے استعمال ہوگا۔

یاد رہے کہ 8 اکتوبر 2023 سے اسرائیل نے لبنان میں فوجی کارروائیاں شروع کیں جو ستمبر 2024 تک ایک وسیع جنگ میں تبدیل ہوگئیں۔ اگرچہ نومبر میں جنگ بندی پر اتفاق ہوا تھا، مگر اسرائیل کی جانب سے جنوبی لبنان پر روزانہ حملے بدستور جاری ہیں۔

دوسری جانب حزب اللہ کی سیاسی کونسل کے نائب سربراہ محمود قماطی نے کہا ہے کہ تحریک مزاحمت لبنان کے اندرونی استحکام کے لیے بات چیت کے لیے تیار ہے اور کسی صورت میں لبنانی فوج کے خلاف نہیں جائے گی۔ ان کا کہنا تھا کہ حزب اللہ اب بھی صہیونی-امریکی سازشوں اور خطرات کا مقابلہ کرنے کی پوری صلاحیت رکھتی ہے۔