ایران کا صیہونی جوہری تحقیقی ادارے پر حملہ؛ دہائیوں کی تحقیقات لمحوں میں خاکستر

سچ خبریں:تل ابیب میں واقع صہیونی ریاست کا سائنسی فخر وایزمن ایرانی میزائل حملے کا نشانہ بنا جس کے نتیجہ میں دہائیوں کی تحقیقات لمحوں میں خاکستر ہو گئیں۔

اسلامی جمہوریہ ایران نے صہیونی ریاست کی جارحیت اور مسلسل اشتعال انگیزیوں کے جواب میں اسرائیل کے نمایاں ترین سائنسی ادارے وایزمن انسٹی ٹیوٹ کو براہِ راست میزائل حملے کا نشانہ بنایا ہے۔

یہ بھی پڑھیں:ایرانی میزائل حملوں سے اسرائیل کو 550 ملین ڈالر کا نقصان

یہ ریسرچ انسٹی ٹیوٹ تل ابیب کے جنوبی علاقے میں واقع تھا اور اسرائیل میں سائنس و ٹیکنالوجی کی برتری کی علامت سمجھا جاتا تھا، ایران نے اس ادارے کو نشانہ بنا کر اسرائیلی ٹیکنالوجی، نیوکلئر تحقیق، اور فوجی سائنسی منصوبوں پر کاری ضرب لگائی ہے۔

ذرائع کے مطابق، حملے کے نتیجے میں ادارے کی بیشتر تحقیقاتی تنصیبات، ڈیٹا سینٹرز، اور تجربہ گاہیں مکمل طور پر تباہ ہو گئی ہیں، جس کے نتیجے میں دہائیوں پر محیط تحقیقی منصوبے اور ڈیجیٹل ذخائر لمحوں میں خاکستر ہو گئے۔

وایزمن کا شمار ان مراکز میں ہوتا تھا جہاں اعلیٰ سطحی نیوروسائنس، بایوٹیکنالوجی، اور دفاعی تحقیق انجام دی جاتی تھی، اور کئی اسرائیلی دفاعی ٹیکنالوجی کمپنیاں اس سے براہ راست منسلک تھیں۔

مزید پڑھیں: صیہونیوں کے لیے سب سے زیادہ نقصان دہ جنگ

یہ حملہ اس بات کی علامت ہے کہ ایران نے اب صرف فوجی اہداف تک محدود رہنے کے بجائے، اسرائیل کی علمی و سائنسی برتری کو بھی میدانِ جنگ کا حصہ بنا لیا ہے۔