پاکستان

کچھ دن میں آئی ایم ایف پروگرام بحال ہو جائے گا۔

20
جون

?️ 20 جون 2022

اسلام آباد(سچ خبریں)وزیرخزانہ مفتاح اسماعیل نے کہا ہے کہ ایک ڈیڑھ دن میں آئی ایم ایف پروگرام بحال ہوجائے گا،آئی ایم ایف کو سرکاری ملازمین کی تنخواہوں میں اضافے پر کوئی اعتراض نہیں ہے، ٹیکس پرغریب طبقے کو ریلیف دیا جائے گا۔

انہوں نے میڈیا سے گفتگو کرتے ہوئے کہا کہ مجھے آئی ایم ایف پروگرام کی بحالی پر پوری امید ہے، امید ہے آئی ایم ایف پروگرام ایک آدھ دن میں بحال ہوجائے گا، آئی ایم ایف کو ملازمین کی تنخواہیں بڑھانے پر کوئی اعتراض نہیں ہے۔

آئی ایم ایف کو 12لاکھ آمدن پر انکم ٹیکس چھوٹ پر کوئی اعتراض نہیں ہے، سالانہ 12لاکھ آمدن پر انکم ٹیکس چھوٹ برقرار رہے گی،مصاحب ثروت لوگوں پر ٹیکس لگے گا جبکہ غریب طبقے کو ریلیف دیا جائے گا۔
دوسری جانب انٹرنیشنل پریس ایجنسی کے مطابق وفاقی حکومت بجٹ پیش کیئے جانے کے ایک ہفتہ بعد بھی فنانس بل پیش کرنے میں ناکام ہے جو عمومی طورپر بجٹ کے فوری بعد یا دوسرے دن پیش کردیا جاتا ہے۔

وزارت خزانہ کا کہنا ہے کہ حکومت نے آئی ایم ایف کی جانب سے تحفظات کے بعد فنانس بل 2022 میں ترامیم پر غور شروع کردیا جس کے بعد فنانس بل قومی اسمبلی میں منظوری کے لیے پیش کردیا جائے گا. ذرائع کے مطابق آئی ایم ایف نے تنخواہ دارطبقے کو47ارب کے ریلیف پر تحفظات کااظہار کیا ہے۔

آئی ایم ایف کی جانب سے بجٹ کو قرض پروگرام کے مقاصد کے مطابق بنانے جبکہ پرسنل انکم ٹیکس میں اصلاحات پرزور دیا گیا ہے ایف بی آرحکام کا کہنا ہے کہ آئی ایم ایف کی جانب سے تحفظات کے بعد تنخواہ دار طبقے کو 47ارب روپے کے ریلیف میں کمی کاامکان ہے. ذرائع کے مطابق آئی ایم ایف اور پاکستانی حکام کے درمیان ٹیکس ریونیو بڑھانے اور اخراجات میں کمی کیلئے مزید بات چیت متوقع ہے جبکہ فنانس بل2022 میں ترامیم جلد پارلیمنٹ میں پیش کیے جانے کا امکان ہے۔

Short Link

Copied