پاکستان

ملک بھر میں بارشوں اور سیلاب نے تباہییاں مچا دیں ہیں،شیری رحمان

25
اگست

?️ 25 اگست 2022

اسلام آباد:(سچ خبریں) وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ ملک بھر میں بارشوں اور سیلاب کی تباہ کاریوں میں 9 سو سے زائد افراد جاں بحق ہوئے ہیں۔

ملک کا کوئی ایسا حصہ نہیں جو بارشوں اور سیلاب کی زد میں نہ ہو، افسوس ہے کہ اس صورتحال کے باوجود خیبر پختونخوا اور پنجاب میں سیلاب زدگان کی مدد کے بجائے عمران خان جلسے کر رہے ہیں، انہیں صرف اپنی سیاست بچانے کی فکر ہے۔

جمعرات کو اپنے ایک بیان میں وفاقی وزیر نے کہا کہ بارشوں اور سیلاب سے کے پی میں 169 اور پنجاب میں 164 لوگ جاں بحق ہوئے ہیں، عمران خان کے پی اور پنجاب میں سیلاب زدگان کی جان و مال بچانے کے بجائے اپنی سیاست بچانے میں لگے ہوئے، کیا عمران خان کو پورے ملک میں سیلاب نظر نہیں آ رہا؟

انہوں نے کہا کہ ایک طرف پورا ملک ڈوب رہا ہے، کروڑوں لوگ متاثر ہوئے ہیں دوسری طرف عمران خان لوگوں کو کہہ رہے ہیں کہ "آخری کال” کے لئے تیار رہیں، پہلے کہتے تھے آخری گیند تک کھیلوں گا اب کہہ رہے ہیں آخری کال دونگا، کیا یہ احتجاج اور مظاہروں کا وقت ہے؟ شیری رحمان نے کہا کہ اپنی سیاست کی فکر کرنے کے بجائے عمران خان کو سیلاب زدگان کی فکر کرنی چاہئے، جلسوں کے بجائے سیلاب زدگان کی مدد کرنی چاہئے، احتجاج کے لئے عوام کا سمندر نکالنے کا اعلان کرنے والے کو لاکھوں بے گھر سیلاب متاثرین نظر نہیں آ رہے، پورا ملک ڈوب جائے لیکن ان کو صرف اپنی سیاست بچانی ہے۔

Short Link

Copied