اسپیشل برانچ کی رپورٹ کے بعد عمران خان کی رہائش گاہ کی سکیورٹی ہائی الرٹ

?️ 10 نومبر 2022

لاہور: (سچ خبریں) اسپیشل برانچ کی عمران خان پر قاتلانہ حملے کی رپورٹ کے بعد زمان پارک کی سکیورٹی ہائی الرٹ کر دی گئی ہے۔ میڈیا رپورٹس کے مطابق عمران خان کی رہائش گاہ زمان پارک کے باہر معمول سے ہٹ کر پولیس کی اضافی نفری تعینات کی گئی ہے۔

چیئرمین تحریک انصاف کی رہائش گاہ کے باہر اسپیشل برانچ اور پولیس حکام بھی موجود ہیں،جبکہ رہائش گاہ کی جانب غیر متعلقہ گاڑیوں اور افراد کے جانے پر پابندی ہے۔

سابق وزیر اعظم کی رہائش گاہ کے ارد گرد سکیورٹی کے خفیہ آلات بھی نصب کر دئیے گئے ہیں اور تحریک انصاف کے رہنما اور صوبائی وزراء کی آمد دی گئی لسٹ سے مشروط ہے۔ یاد رہے اسپیشل برانچ نے رپورٹ دی تھی کہ عمران خان پر ایک اور قاتلانہ حملہ ہو سکتا ہے۔

قبل ازیں چئیرمین پی ٹی آئی عمران خان کے دونوں بیٹے قاسم خان اور سلیمان خان لاہور پہنچے،مشیر داخلہ عمر سرفراز چیمہ نے دونوں کا ائیرپورٹ پر استقبال کیا۔

قاسم اور سلیمان زمان پارک میں والد کی رہائشگاہ پہنچے جہاں پر انہوں نے عمران خان سے ملاقات کی اور ان کی خیریت دریافت کی۔ذرائع کے مطابق قاسم اور سلیمان نے والد سے کہا کہ آپ پر حملے کی خبر نے ہمیں پریشان کر دیا تھا۔ جس پر عمران خان نے بیٹوں کو حوصلہ دیتے ہوئے کہا کہ اللہ تعالٰی کا شکر ہے اس نے حملے سے بچایا۔ جبکہ عمران خان پر قاتلانہ حملے کی خبر جب ان کے دونوں بیٹوں سلیمان خان اور قاسم خان کو پہنچی تو پاکستان جانا چاہتے تھے لیکن جب ان کا عمران خان سے رابطہ ہوا تو انہوں نے آنے سے منع کر دیا،دونوں بیٹے اب اپنے باپ پر ہونے والے حملے سے بہت پریشان اور غمزدہ تھے۔

عمران خان نے انہیں تسلی دی کہ وہ جلد ٹھیک ہوجائیں گے۔کچھ دیر گفتگو کرنے کے بعد دونوں بیٹوں نے یہ کہہ کر فون رکھ دیا کہ ہمیں آپ پر فخر ہے۔یہ الفاظ سن کر عمران خان نے انہیں کچھ نصیحتیں بھی کیں۔