مزاحمت کو غیر مسلح کرنے کی سازش جڑ سے ختم: شیخ نعیم قاسم

سچ خبریں:حزب اللہ کے نائب سیکرٹری جنرل شیخ نعیم قاسم نے کہا ہے کہ دشمن کے عزائم کو ملکی فوج، مزاحمتی دستوں اور عوام کی یکجہتی سے ناکام بنایا جا سکتا ہے۔

 انہوں نے زور دے کر کہا کہ لبنان کے بنیادی مسئلے کا واحد حل صہیونی یلغار کے خلاف مزاحمت اور اس آپشن کے گرد مکمل اتحاد ہے۔

شیخ نعیم قاسم نے آج پیر کو الحَدث میڈیکل سینٹر کے افتتاحی تقریب سے خطاب کرتے ہوئے کہا کہ یہ مرکز حزب اللہ کے اس طویل المدت منصوبے کا حصہ ہے جس کا مقصد مختلف علاقوں میں طبی و ہسپتالی سہولیات فراہم کرنا ہے۔

انہوں نے مزید کہا کہ ہم ملکی فوج، مزاحمت اور عوام کی اس طاقت پر بھروسہ کرتے ہوئے، جس نے لبنان کی حفاظت کی، اسے آزاد کرایا اور دشمن کو روکا، دشمن کے ہر منصوبے کو ناکام بنا سکتے ہیں۔

حزب اللہ رہنما نے وضاحت کرتے ہوئے کہا کہ صہیونی دشمن کا لبنان اور خطے میں توسیع پسندانہ عزائم ہیں اور اپنے منصوبوں کو کامیاب بنانے کے لیے وہ مجرمانہ اقدامات اور مظالم پر اتر آتا ہے۔

انہوں نے نشاندہی کی کہ لبنان کو درپیش بنیادی مسئلہ امریکی-اسرائیلی جارحیت ہے اور اس کا بنیادی حل لبنان میں اس جارحیت کے خلاف مزاحمت اور اسی آپشن کے گرد یکجہتی و اتحاد ہے۔

شیخ نعیم قاسم نے کہا کہ بڑی طاقتوں، بالخصوص امریکہ، نے لبنان، اس کی حکومت اور فوج پر مقاومت کو غیرمسلح کرنے کے لیے مختلف دباؤ ڈالے اور لبنانی حکومت کو اسلحہ کی اجارہ داری کے نام پر ایک تباہ کن فیصلہ کرنے پر مجبور کرنے کی کوشش کی۔

انہوں نے تصریح کی کہ یہ تمام بین الاقوامی دباؤ اس لیے ناکام ہو گئے کیونکہ وہ آئین میں درج حق دفاع کے منافی تھے۔

ان کا کہنا تھا کہ فوج، مقاومت اور عوام کی ہشیاری کی وجہ سے یہ فتنہ شروع ہی میں ناکام ہو گیا اور ملک کو تباہ کرنے کے لیے جس آشوب کی کوشش کی جا رہی تھی، وہ کبھی برپا نہ ہو سکا۔

حزب اللہ رہنما نے کہا کہ انہوں نے یہ بہانہ بنا کر کہ پہلے اسلحہ کی اجارہ داری کا مسئلہ حل ہونا چاہیے، تعمیر نو میں رکاوٹ ڈالنے کی کوشش کی، لیکن خدا کا شکر ہے کہ وہ اس میں بھی کامیاب نہ ہو سکے، کیونکہ وہ یہ نہیں جانتے کہ مقاومت اور اس کے حامی ایک ہی جسم ہیں۔