سوڈان نے روس کو افریقہ میں پہلی بحری فوجی اڈے کی پیشکش کر دی: وال اسٹریٹ جرنل کا دعوٰی

?️ 3 دسمبر 2025

سوڈان نے روس کو افریقہ میں پہلی بحری فوجی اڈے کی پیشکش کر دی: وال اسٹریٹ جرنل کا دعوٰی

مسکو سے موصولہ اطلاعات کے مطابق امریکی اقتصادی اخبار وال اسٹریٹ جرنل نے دعویٰ کیا ہے کہ سوڈانی حکام نے روس کو بحیرہٴ احمر کے ساحل پر اپنا پہلا بحری فوجی اڈہ قائم کرنے کی پیشکش کی ہے، جو ماسکو کے لیے ایک بڑی تزویراتی کامیابی تصور کی جا رہی ہے۔ رپورٹ میں کہا گیا ہے کہ یہ تجویز پچیس سالہ معاہدے کی شکل میں اکتوبر میں روس کے سامنے رکھی گئی جس کے تحت ماسکو کو پورت سودان یا بحیرہٴ احمر کے کسی اور مقام پر تین سو اہلکار اور زیادہ سے زیادہ چار جنگی بحری جہاز تعینات کرنے کی اجازت ملے گی۔

وال اسٹریٹ جرنل کے مطابق سوڈان اس کے بدلے روس سے جدید فضائی دفاعی نظام اور دیگر اسلحہ رعایتی نرخوں پر حاصل کرنا چاہتا ہے۔ رپورٹ میں مزید کہا گیا کہ تجویز کردہ مقام تجارتی لحاظ سے انتہائی اہم سمندری راستوں کے قریب واقع ہے، جو اس اڈے کو روس کے لیے غیر معمولی اسٹریٹجک اہمیت دے گا۔ معاہدے کے مسودے میں روس کو سودان میں قیمتی معدنیات کے منصوبوں تک رسائی دینے کی بات بھی شامل ہے، جہاں ملک افریقہ میں سونے کا تیسرا بڑا پیداواری مرکز ہے۔

اخبار نے اس پیش رفت کو امریکہ کے لیے تشویش ناک قرار دیتے ہوئے لکھا کہ واشنگٹن افریقی بنادرگاہوں پر روس اور چین کے بڑھتے اثر و رسوخ کو روکنے کی کوشش کر رہا ہے۔ ایک نام ظاہر نہ کرنے والے سودانی عسکری اہلکار نے اخبار کو بتایا کہ ملک کو ہنگامی طور پر جدید اسلحے کی ضرورت ہے۔

روسی حکام نے اس رپورٹ کی تصدیق یا تردید سے گریز کیا ہے۔ تاہم روسی میڈیا کا کہنا ہے کہ دونوں ممالک نے 2020 میں بحری لوجسٹک مرکز کے قیام پر اصولی اتفاق کیا تھا، مگر 2019 کی سیاسی تبدیلیوں کے بعد بات چیت رک گئی۔ 2025 کے آغاز میں سابق سودانی وزیر خارجہ نے دعویٰ کیا تھا کہ فریقین اس معاملے پر باہمی سمجھوتے تک پہنچ چکے ہیں، لیکن روسی سفیر نے بعدازاں یہ واضح کیا کہ سوڈان میں جاری خانہ جنگی کے سبب عمل درآمد کا عمل دوبارہ تعطل کا شکار ہو گیا ہے۔