ہمارے جاہل مفکرینِ دیواروں سے ٹکریں مار رہے ہیں، عارف علوی

27 اکتوبر 2024

کراچی: (سچ خبریں) سابق صدر مملکت اور پی ٹی آئی رہنماء ڈاکٹر عارف علوی کا کہنا ہے کہ ہمارے جاہل مفکرینِ دیواروں سے ٹکریں مار رہے ہیں۔ سکیورٹی تھنک ٹینک کی جانب سے امریکی لابنگ فرم کی خدمات حاصل کرنے کی خبر پر ردعمل میں انہوں نے کہا کہ اظہر من الشمس ہے کہ ہمارے جاہل مفکرینِ دیواروں سے ٹکّریں مار رہے ہیں، پہلے کہتے رہے کہ تحریکِ انصاف سوشل میڈیا پر کروڑوں روپے خرچ کرتی ہے، اِن بیوقوفوں نے اربوں خرچ کر کے دیکھ لیا تو پتا چلا کہ نوجوانوں کے جذبات کے آگے اربوں کھربوں کی کوئی وُقعت نہیں ہے۔

اپنے ایک بیان میں سابق صدر پاکستان نے لکھا پھر کہا کہ بھائی یہ سب عمران خان کے سحر میں مبتلا ہیں، کلٹ بن گیا ہے جس کے نتیجے میں 90 فیصد پاکستانی غلط راستے پر چل پڑے ہیں اور راستہ کون دکھا رہا ہے؟ پرانے منجھے ہوئے چور اور لٹیرے، پھر آقاؤں کے مُلک سے جب ظلم کے خلاف آوازیں اٹھنے لگیں تو کہا کہ تحریک انصاف کے بیرون ملک پاکستانی ہمدرد اربوں روپے خرچ کر رہے ہیں تب ہی تو 90 فیصد کانگریسی نمائندوں نے مشترکہ بل پاس کردیا۔

عارف علوی کہتے ہیں کہ توبہ توبہ لفافہ صحافیوں نے پینترا بدلا کہ سارے کانگریس کی یہودی لابی عمران خان کی سپورٹ کر رہی ہے، کبھی دنیا کو ڈراتے ہیں کہ طالبان خان سے ہوشیار رہو، پھر یہودی لابی کا لیبل لگاتے ہیں، ہیجانی کیفیت طاری ہے اور سمجھ میں ککھ نہیں آرہا، اب کیا کریں؟ اپنا الّو کیسے سیدھا کریں؟ کیوں کہ ‘ہر شاخ پہ الو بیٹھا ہے انجام گلستاں کیا ہوگا’، اب اس سلسلے کی ایک نئی احمقانہ حرکت اس خبر سے ظاہر ہوتی ہے، کوشش ہے کہ آقاؤں کو اپنے کالے کو سفید کر کے کیسے دکھایا جائے؟