سوات(سچ خبریں) وفاقی وزیر مراد سعید نے سوات میں ترقیاتی کاموں سے متعلق اہم بیان دیتے ہوئے کہا کہ سوات میں ریکارڈ ترقیاتی کام کروارہے ہیں، ہمارا مقصد اسمبلی میں جانا نہیں بلکہ عوام کی خدمت ہے، نوجوانوں کو سوات میں ہی تعلیمی ماحول دے رہے ہیں۔
سوات کے علاقے جٹکوٹ میں عوامی اجتماع سے خطاب کرتے ہوئے مراد سعید کا کہنا تھا کہ ایک دور تھا جب سوات میں اسکول، سڑکیں اور پُل تباہی کا شکار تھے، سال 2013میں ہمیں اقتدار ملا تو پختونوں کے لئے حقوق کا نعرہ لگایا۔
انہوں نے کہا کہ دہشت گردی نے خیبرپختونخوا کو تباہی کے دہانے پر کھڑا کیا تھا، فیز ٹو کے لئے چکدرہ سے فاتح پور موٹر وے کا جلد افتتاح کریں گے، سوات کے ایک حلقےمیں 6یونیورسٹیاں بنا رہے ہیں۔
وفاقی وزیر نے کہا کہ نوجوانوں کو سوات میں ہی تعلیمی ماحول دے رہے ہیں، غریب خاندان کو10لاکھ تک صحت خرچہ حکومت دے رہی ہے، پہلے غریب کو اسپتال کی ضرورت تھی آج اسپتالوں کو غریب کی ضرورت ہے۔مراد سعید نے کہا کہ بچوں کے لئے خیبرپختونخوا کا سب سے بڑا اسپتال سوات میں بنا رہے ہیں، صوبے کا دوسرا برن اسپتال سوات میں بنا رہے ہیں، سیاحتی علاقوں کے لئے سڑکیں بنا رہے ہیں۔
انہوں نے کہا کہ بجلی کا مسئلہ حل کرنے کے لیے دو گرڈ اسٹیشنز بن رہے ہیں، سوات کی ہر تحصیل میں ریسکیواسٹیشن قائم کیا، بیرون ملک پاکستانیوں کے لیے وزیراعظم عمران خان نے آواز اٹھائی۔ان کا مزید کہنا تھا کہ پی ٹی آئی کی حکومت نے بیرون ملک پاکستانیوں کو ووٹ کا اختیار دیا اور بیرون ملک جیلوں میں قید پاکستانیوں کو رہائی دلوائی۔
