بھارت مذاکرات کیلئے 5 اگست کے فیصلے پرنظرثانی کرے: وزیر خارجہ

?️ 19 اپریل 2021

دبئی (سچ خبریں) وزیرخارجہ شاہ محمود قریشی نےبھارت کو مذاکرات کے لئے مشروط پیشکش کر دی  ان کا کہنا تھا کہ  بھارت مذاکرات کیلئے 5 اگست کے فیصلے پرنظرثانی کرے اور کشمیریوں کیلئے سازگارماحول پیدا کرے دونوں ملکوں کے پاس مذاکرات کے سوا کوئی راستہ نہیں ہے۔

تفصیلات کے مطابق انہوں نے یواے ای میں میڈیا سے گفتگو کرتے ہوئے کہا کہ بھارتی ہم منصب سے ملاقات طے نہیں۔بھارت5 اگست کے فیصلے پرنظرثانی کرے پاکستان بھارت سے مذاکرات کیلئے تیار ہے۔ بھارت مذاکرات کی میز پر بیٹھنے کیلئے کشمیریوں کیلئے سازگارماحول پیدا کرے۔

انہوں نے کہا کہ دونوں ایٹمی قوتوں کے پاس مذاکرات کے علاوہ کیا کوئی اورراستہ ہے؟افغانستان میں امن ہوگا تواس کا براہ راست فائدہ پاکستان کا ہوگا۔انہوں نے کہا کہ بھارت کے ساتھ مسائل ہیں آئیں اور بیٹھ کر بات کرے۔بھارت کے ساتھ بیک چینل کی کیا ضرورت ہے؟ شرمانا اورپردہ کیسا ہے؟ پاکستان اوربھارت کے درمیان باضابطہ کوئی بیک چینل نہیں ہے۔

شاہ محمود قریشی نے کہا کہ یواےای سے تہران جاؤں گا،ا یران کے بعد ترکی جاؤں گا۔ بھارت مذاکرات کی میزپربیٹھنے کیلئے کشمیریوں کیلئے سازگارماحول پیدا کرے۔جب امن ہوگا توپاکستان میں سرمایہ کاری آئے گی۔ اسی طرح وزیر خارجہ مخدوم شاہ محمود قریشی  نے متحدہ عرب امارات میں، یکم اکتوبر2021 سے شروع ہونیوالی، بین الاقوامی نمائش (ورلڈ ایکسپو 2020 ) کا دورہ کیا۔

متحدہ عرب امارات میں تعینات پاکستانی سفیر افضال محمود ،قونصل جنرل دوبئی قونصلیٹ احمد امجد علی اور سفارتخانے کے سینئر افسران بھی وزیر خارجہ کے ہمراہ تھے اس مو قع پر وزیر خارجہ شاہ محمود قریشی نے کہا  کہ رواں سال یکم اکتوبر 2021 سے شروع ہونیوالی اس بین الاقوامی نمائش میں پاکستانی پویلین کی موجودگی ، پاکستان اور متحدہ عرب امارات کے مابین دہائیوں پر محیط دوستی کا مظہر ہے۔