اپوزیشن ملکی ترقی میں رکاوٹ بن رہی ہے: فردوس عاشق

🗓️ 6 جولائی 2021

لاہور (سچ خبریں)معاون خصوصی اطلاعات پنجاب ڈاکٹر فردوس عاشق اعوان نے کہا ہے کہ اپوزیشن ملکی ترقی وعوامی خوشحالی کی راہ میں رکاوٹ بن رہی ہے۔ ملکی ترقی، عوامی مسائل کےحل میں رکاوٹ ڈالنے والوں کو عوام کبھی معاف نہیں کریں گے۔

ڈاکٹر فردوس عاشق اعوان نے سماجی رابطے کی ویب سائٹ ٹوئٹر پر اپنے ایک پیغام میں کہا ہے کہ قانون کی عملداری، بلاتفریق احتساب، یکساں ترقی کے اقدامات سے اپوزیشن کی نیندیں حرام ہو چکی ہیں، ‏وزیراعظم عمران خان کی قیادت میں بڑھتا سنورتا پاکستان اپوزیشن کی کرپٹ بنیادوں کو ہلا چکا ہے۔

فردوس عاشق اعوان نے کہا ہے کہ اپوزیشن کی بوکھلاہٹ پاگل پن کی شکل اختیار کر رہی ہے۔انہوں نے مزید کہا کہ وزیراعظم کی قیادت میں ترقی کا روڈ میپ اپوزیشن کے لیے کاؤنٹ ڈاؤن ثابت ہوگا۔فردوس عاشق اعوان کا کہنا تھا کہ ملکی ترقی، عوامی مسائل کےحل میں رکاوٹ ڈالنے والوں کو عوام کبھی معاف نہیں کریں گے۔

فردوس عاشق اعوان کا کہنا ہے کہ پہلے 274 یونین کونسلیں لاہور کے مئیر کا انتخاب کرتی تھیں، اب لاہور کے عوام لاہور کے میئر کا انتخاب کریں گے۔پنجاب کے وزیرِ اعلیٰ سردار عثمان بزدار کی معاونِ خصوصی برائے اطلاعات ڈاکٹر فردوس عاشق اعوان نے پی ڈی ایم اے آفس لاہور میں میڈیا کو بریفنگ دیتے ہوئے کہا کہ پی ڈی ایم اے عوام کو مشکلات سے نکالنے میں اپنا کردار ادا کرتا ہے، اداروں کو بااختیار بنانا وزیرِ اعظم عمران خان کا منشور ہے۔

انہوں نے کہا کہ پی ڈی ایم اے ایک مضبوط ادارے کی شکل اختیار کر چکا ہے، ریسکیو اینڈ ریلیف میں پی ڈی ایم اے ہمیشہ پیش پیش رہا ہے، کورونا جیسی آفات میں بھی اس ادارے کا کردار ڈھکا چھپا نہیں، لوکل گورنمنٹ کے اداروں کو فی الفور بحال کرنے کا حکم دیا ہے۔فردوس عاشق اعوان نے کہا کہ حکومت کی پٹیشن رجسٹرڈ کر لی گئی ہے، ہم چاہتے ہیں کہ اسے فوری سنا جائے، حکومت جمہوریت کی نرسری نچلی سطح پر اگانے جا رہی ہے۔