اتحادیوں کا فیصلہ کن اجلاس

?️ 28 مارچ 2022

اسلام آباد(سچ خبریں)وزیراعظم عمران خان کے خلاف تحریک عدم اعتماد کے معاملے پر فیصلہ کن مشاورت کے لیے حکومت کی اتحادی جماعتیں آج سر جوڑ کر بیٹھیں گے ، اسلام آباد میں ہونے والی ان ملاقاتوں میں مسلم لیگ ق ، ایم کیو ایم اور بی اے پی قیادت کی طرف سے مستقبل کا لائحہ عمل ترتیب دیا جائے گا۔

ذرائع کے حوالے سے بتایا گیا ہے کہ ق لیگ اور ایم کیوایم کے رہنماؤں کی ملاقات آج دن ایک بجے ہوگی ، جس میں ق لیگ کی طرف سے چوہدری پرویز الہٰی ، طارق بشیر چیمہ و دیگر رہنماء ملاقات میں موجود ہوں گے ، اس ملاقات میں ن لیگ ، پی پی رہنماؤں سے ملاقات سے بھی آگاہ کیا جائے گا اور سیاسی صورتحال سمیت تحریک عدم اعتماد پر بھی تبادلہ خیال کیا جائے گا جب کہ ق لیگ ایم کیو ایم سے ملاقات کے بعد دن 3 بجے بی اے پی رہنماؤں سے بھی ملاقات کرے گی۔

اتحادی جماعتوں سے اپوزیشن کے معاملات طے ہونے کی خبروں پر حکومتی ردعمل آگیا ، وزیر خارجہ شاہ محمود قریشی کہتے ہیں کہ مسلم لیگ نواز ق لیگ کے ساتھ کھلواڑ کر رہی ہے اور ایم کیو ایم کو پیپلزپارٹی مختلف آفرز کررہی ہے اور اس جماعت کا غلط استعمال کرنا چاہ رہی ہے جب کہ شاہ زین بگٹی کا فیصلہ غیر منطقی ہے، موجودہ حکومت نے بلوچستان کیلئے خاص پیکج دیا اور اب وہاں امن عامہ کا مسئلہ آج کا نہیں ہے جب کہ ہمارے حلیفوں سے ہماری کل بھی ملاقات ہوئی ہے ، پاکستان مسلم لیگ ن اس وقت ق لیگ کو استعمال کرنا چاہ رہی ہے اور ان کے ساتھ کھلواڑ کر رہی ہے تاہم ق لیگ والے تجربہ کار لوگ ہیں ، اسی طرح ایم کیو ایم کو پیپلزپارٹی مختلف آفرز کررہی ہے اوراس جماعت کا غلط استعمال کرنا چاہ رہی ہے۔

شاہ محمود قریشی نے کہا کہ منحرف ارکان اگرحکومت سےنالاں ہیں تواستعفیٰ دیں یہ نہیں ہوسکتا کہ ووٹ عمران خان کے نام پرلیں اور ووٹ ضمیرفروشی سے دیں ،عوام کا اعتماد وزیراعظم کوکل کے جلسے میں مل گیا ، پنڈال میں موجود لوگوں سے دگنے لوگ پنڈال سے باہرموجود تھے۔