شہرِ قائد میں بارش کے بعد منفی پروپیگنڈا کیا جارہا ہے۔ مرتضی وہاب

?️ 22 اگست 2025

کراچی (سچ خبریں) میئر کراچی بیرسٹر مرتضی وہاب نے کہا ہے کہ شہرِ قائد میں بارش کے بعد منفی پروپیگنڈا کیا جارہا ہے۔

میڈیا سے گفتگو کرتے ہوئے بیرسٹر مرتضی وہاب کا کہنا تھا کہ کراچی میں 300 ملی میٹر بارش ریکارڈ کی گئی جب کہ کراچی کے نالوں میں 40 ملی میٹر برساتی پانی کی گنجائش ہے۔ انہوں نے کہا کہ بارشوں کے بعد کی صورتحال پر پروپیگنڈا کیا گیا، کہا جارہا تھا نالے صاف نہیں کرائے، سارا پانی نالوں سے گزر کر ہی سمندر میں گیا۔

میئر کراچی کا کہنا تھا کہ شہر میں 600 نالے ہیں، بڑے نالے کے ایم سی کی ذمہ داری ہیں، بارش کہیں بھی ہو پانی کے ایم سی کے نالوں سے گزرتا ہے، 516 نالے گلی محلوں میں ہیں جو ٹاؤنوں کی ذمے داری ہیں، حکومت سندھ جماعت اسلامی کے9 ٹاؤنوں کو ہر ماہ 1 ارب روپے دیتی ہے، ٹاؤنوں کو اب تک 27 ارب روپے دیے جاچکے۔

مرتضیٰ وہاب نے کہا کہ کہاجارہا تھا کہ نالے صاف نہیں کرائے، یہ سارا پانی نالوں سے گزر کر سمندر میں گیا ہے، منگھوپیر میں بارش ہو یا لیاری میں، پانی نالوں سے گزرتا ہے، کراچی میں 300 ملی میٹر سےزائد پانی نالوں سے ہی نکالا گیا۔

ان کا کہنا تھا کہ کراچی میں7 اضلاع کی صفائی کیلئے ٹھیکے دیے تاکہ مشینری کم نہ ہو، تنقید برائے تنقید نہیں ہونی چاہیے، چند لوگ 300 ملی میٹر بارش کو چند منٹوں کی بارش بول رہے ہیں، میں باتیں نہیں دہرانا چاہتا کہ ماضی کی حکومتوں کے دور میں کیا ہوا۔