27 ویں ترمیم کے بعد بلاول کے پاس وزیراعظم بننے کا بہترین موقع ہے۔ فیصل واوڈا

?️ 3 نومبر 2025

اسلام آباد (سچ خبریں) سینئر سیاسی رہنما و سینیٹر فیصل واوڈا نے کہا ہے کہ 27 ویں ترمیم کے بعد بلاول بھٹو زرداری کے پاس وزیراعظم بننے کا بہترین موقع ہے۔

فیصل واوڈا کا کہنا تھا کہ میں نے پہلے ہی کہا تھا 27ویں ترمیم آئے گی، جو آنے کے بعد آسانی سے پاس بھی ہوجائے گی۔ اُنہوں نے کہا کہ پارلیمنٹرینز کا کام ہی قانون سازی کرنا ہے، اگر 77 سال کی عمر میں سیاست دان کام کرسکتا ہے تو ججز، پولیس، فوج میں کیوں نہیں، پاکستان کی ضرورت کے حساب سے اُنہیں بھی کام کرنا چاہیے۔

سینئر سیاسی رہنما کا کہنا تھا کہ 27ویں ترمیم کے بعد 26ویں ترمیم کے خلاف درخواستیں غیرمتعلقہ ہوجائیں گی، آئینی عدالت ملک کی ضرورت ہے۔

فیصل واوڈا کا مزید کہنا تھا کہ آصف زرداری سیاسی چال کے بڑے کھلاڑی ہیں ،بلاول بھٹو زرداری کے پاس وزیراعظم بننے کا یہ بہترین موقع ہے، سکیورٹی کے معاملات کو بھی وفاق کو دیکھنا چاہیے اور پورے ملک میں ایجوکیشن کا ایک نظام ہونا چاہیے۔