بیروت ایئرپورٹ پر خلیل الحیہ کو نشانہ بنانے کی ناکام سازش

بیروت ایئرپورٹ پر خلیل الحیہ کو نشانہ بنانے کی ناکام سازش

 ایک صہیونی میڈیا ادارے نے انکشاف کیا ہے کہ غزہ پر جنگ کے ابتدائی مہینوں میں اسرائیل نے حماس کے سینئر رہنما خلیل الحیہ کو بیروت کے بین الاقوامی ہوائی اڈے پر فضائی حملے کے ذریعے قتل کرنے کی منصوبہ بندی کی تھی، تاہم یہ سازش آخری لمحے میں ناکام بنا دی گئی۔

اسرائیلی سرکاری ریڈیو اور ٹیلی وژن کے مطابق، خلیل الحیہ کو براہِ راست فضائی حملے میں نشانہ بنانے کا منصوبہ تیار کیا گیا تھا، مگر انٹیلی جنس اداروں کے پاس ان کی درست موجودگی کے حوالے سے مصدقہ معلومات نہ ہونے کے باعث کارروائی منسوخ کر دی گئی۔

یہ انکشاف ایسے وقت میں سامنے آیا ہے جب اس سے قبل ستمبر 2025 میں قطر کے دارالحکومت دوحہ میں حماس کے مذاکراتی وفد کو نشانہ بنانے کی ایک اور کوشش ناکام ہو چکی ہے، جس میں خلیل الحیہ بھی وفد کا حصہ تھے۔ اس حملے میں ان کے بیٹے ہمام سمیت ان کے دفتر کے کئی ساتھی اور عملے کے افراد شہید ہو گئے تھے، جبکہ خلیل الحیہ محفوظ رہے۔

سیاسی مبصرین کے مطابق، اس طرح کے انکشافات خطے میں جاری کشیدگی اور اسرائیلی خفیہ کارروائیوں کی شدت کو واضح کرتے ہیں، جو نہ صرف فلسطین بلکہ دیگر ممالک کی خودمختاری کے لیے بھی خطرہ بن رہی ہیں۔