یورپی یونین کی غزہ میں اسرائیل کی جانب سے جنگ بندی کی بار بار خلاف ورزی کی مذمت

یورپی یونین کی غزہ میں اسرائیل کی جانب سے جنگ بندی کی بار بار خلاف ورزی کی مذمت

یورپی یونین کی کمشنر برائے مساوات، حاجہ لحبیب نے غزہ میں اسرائیل کی جانب سے جنگ بندی کی مسلسل خلاف ورزیوں کی سخت الفاظ میں مذمت کی ہے اور مطالبہ کیا ہے کہ اسرائیل بین الاقوامی انسانی حقوق کے قوانین کی مکمل پابندی کرے۔

خبر رساں ادارے انادولو کے مطابق، لحبیب نے اتوار کے روز سوشل میڈیا پلیٹ فارم ایکس پر ایک بیان میں کہا کہ ہم غزہ میں جنگ بندی کی بار بار خلاف ورزیوں کی مذمت کرتے ہیں، جن کے نتیجے میں حالیہ اسرائیلی حملوں کے دوران سیکڑوں فلسطینی شہید اور زخمی ہوئے ہیں۔

انہوں نے اس بات پر زور دیا کہ بین الاقوامی انسانی حقوق کے قوانین کا ہر حال میں احترام کیا جانا چاہیے اور غیر فوجی افراد کو ہر جگہ اور ہر وقت تحفظ فراہم کیا جانا ضروری ہے۔

دوسری جانب، فلسطینی وزارتِ صحت نے اتوار کے روز جاری کردہ تازہ بیان میں اعلان کیا کہ غزہ پر جاری جنگ کے نتیجے میں شہدا کی مجموعی تعداد 71 ہزار 795 تک پہنچ چکی ہے۔

بیان کے مطابق، گزشتہ 24 گھنٹوں کے دوران 26 فلسطینی شہید اور 68 زخمی غزہ کے اسپتالوں اور طبی مراکز میں منتقل کیے گئے۔

وزارتِ صحت نے بتایا کہ اب بھی بڑی تعداد میں متاثرین ملبے تلے اور سڑکوں پر دبے ہوئے ہیں، تاہم امدادی ٹیمیں ضروری وسائل کی کمی کے باعث ان تک رسائی حاصل نہیں کر پا رہیں۔

مزید بتایا گیا کہ 11 اکتوبر سے شروع ہونے والی جنگ بندی کے بعد اب تک 523 فلسطینی شہید اور 1,443 زخمی ہو چکے ہیں، جبکہ 715 دیگر شہدا کی لاشیں بھی دریافت کی گئی ہیں۔

وزارت کے مطابق، 7 اکتوبر 2023 سے اب تک غزہ میں مجموعی طور پر 71 ہزار 795 فلسطینی شہید اور 171 ہزار 551 زخمی ہو چکے ہیں۔

امریکہ کی حمایت سے اسرائیلی جارحیت نے نہ صرف فلسطینی عوام کے خلاف نسل کشی کو جنم دیا بلکہ غزہ میں وسیع پیمانے پر تباہی بھی مچائی، جس کے نتیجے میں اس علاقے کے تقریباً 90 فیصد بنیادی ڈھانچے کو نقصان پہنچا ہے۔ اقوامِ متحدہ کے اندازے کے مطابق، اس تباہی کی بحالی پر تقریباً 70 ارب ڈالر لاگت آئے گی۔