ہمارے پاس جو کچھ بھی ہے کربلا کی دین ہے:نصراللہ

🗓️ 30 جولائی 2022

سچ خبریں:لبنان کی حزب اللہ تحریک کے سربراہ سید حسن نصراللہ نے محرم کی آمد کے موقع پر تقریر کرتے ہوئے کہا کہ آج ہم جہاں بھی پہنچے ہیں یہ کربلا کی وجہ سے ہے۔
لبنانی حزب اللہ کے سربراہ سید حسن نصر اللہ نے جنوبی بیروت کے ضاحیہ علاقے میں محرم الحرام چودہ سو چوالیس کی پہلی شب کی مناسبت سے عوام سے خطاب کرتے ہوئے کہا کہ ہمیں جو بھی کامیابیاں حاصل ہوئی ہیں یہ کربلا کے طفیل میں حاصل ہوئی ہیں۔

حزب اللہ لبنان کے سربراہ نے کہا کہ اسلامی مزاحمت و استقامت کو کربلا، عاشورا، امام حسین اور حضرت زینب سے جدا نہیں سمجھا جا سکتا ہے اور گزشتہ چالیس برسوں کے دوران ہم نے جو صبر، جہاد، فداکاری، پامردی کا مظاہرہ کیا نیز ہمیں کامیابیاں حاصل ہوئیں، وہ سب کچھ امام حسین کی دین ہیں۔

سید حسن نصر اللہ کا کہنا تھا عاشور کے طفیل میں ہماری راہ تمام تر قوت و طاقت، نشاط و شادابی، استقامت و پامردی اور صبر و توکل کے ساتھ جاری ہے،قابل ذکر ہے کہ آج ایران اور عراق میں محرم الحرام 1444 کا باقاعدہ آغاز ہو چکا ہے، کربلا میں گزشتہ شب ایک قدیمی روایت کے تحت موسم عزا کی آمد پر امام حسین علیہ السلام کے مزار اقدس پر پرچم عزا کو لہرا دیا گیا،اس موقع پر دسیوں ہزار زائرین کی صدائے لبیک یا حسین سے کربلا کی فضائیں گونج اٹھیں۔