عالمی براداری نے مقبوضہ کشمیر کے لیے کیا کیا ہے؟

🗓️ 24 اگست 2023

سچ خبریں: کل جماعتی حریت کانفرنس نے کہا ہے کہ بھارت کے غیر قانونی زیر قبضہ جموں و کشمیر کی ابتر صورتحال دنیا کی فوری توجہ کی متقاضی ہے۔

کشمیرمیڈیاسروس کے مطابق کل جماعتی حریت کانفرنس کے رہنماوں سید بشیر اندرابی، خواجہ فردوس، محمد شفیق لون، زمردہ حبیب، چوہدری شاہین اقبال، غلام نبی وار اور حکیم عبدالرشید نے اپنے بیانات میں مقبوضہ کشمیر میں بھارت کی طرف سے جاری ریاستی دہشت گردی پر شدید تشویش کا اظہار کیا۔

یہ بھی پڑھیں: مقبوضہ کشمیر دنیا کی سب سے بڑی اوپن جیل بن چکا ہے: وزیر خارجہ

انہوں نے کہا کہ بھارتی فورسز کے اہلکار محاصرے اور تلاشی کی نام نہاد کارروائیوں کے دوران کشمیری نوجوانوں کو بلا وجہ گرفتار کررہے ہیں ۔

انہوں نے افسوس کا اظہار کیا کہ بھارت حق پر مبنی کشمیریوں کے مطالبے کو طاقت کے وحشیانہ استعمال سے کمزور کرنے کی کوشش کر رہا ہے۔

ان کا کہنا تھا کہ بی جے پی حکومت مقبوضہ علاقے میں پبلک سیفٹی ایکٹ اور یواے پی اے جیسے کالے قوانین کے ذریعے ہر اختلافی آواز کو دبانے کی کوشش کی رہی ہے ۔

کل جماعتی حریت کانفرنس کے رہنماؤں نے کہا کہ مودی حکومت نے اظہار رائے کی آزادی کے حق اورآزادی صحافت سمیت کشمیریوں کے تمام بنیادی حقوق سلب کررکھے ہیں ۔

انہوں نے کہا کہ بھارت اپنا سامراجی رویہ ترک کرے، مقبوضہ جموں وکشمیر کے زمینی حقائق کو تسلیم کرے اور تنازعہ کشمیر کو حل کرے۔

مزید پڑھیں: بھارتی جیلوں میں کشمیری رہنماؤں کی مظلومیت کی انتہا

انہوں نے اقوام متحدہ پر زور دیا کہ وہ جنوبی ایشیا میں پائیدار امن کو یقینی بنانے کے لیے مسئلہ کشمیر کو اپنی قراردادوں اور کشمیریوں کی امنگوں کے مطابق حل کرنے کیلئے اپنا کردار ادا کرے۔