امیر جماعت اسلامی کا اہم اعلان اور حکومت کو انتباہ

🗓️ 3 جولائی 2024

سچ خبریں: جماعت اسلامی کے امیر حافظ نعیم الرحمان، نے 12 جولائی کو اسلام آباد میں دھرنا دینے کا اعلان کیا ہے۔

منصورہ لاہور میں پریس کانفرنس کرتے ہوئے، حافظ نعیم نے کہا کہ شہباز شریف قوم کو ریلیف دیں اس سے پہلے کہ قوم بپھر جائے اور انہیں جانے کا راستہ نہ ملے۔

انہوں نے اعلان کیا کہ 12 جولائی کو اسلام آباد میں دھرنا دیں گے، اور اٹھنے کی صرف ایک شرط ہوگی کہ عوام کو ریلیف دیا جائے، انہوں نے کہا کہ ہم انارکی اور جلاؤ گھیراؤ نہیں چاہتے۔

یہ بھی پڑھیں: جعلی حکومت بہتری نہیں لاسکتی، سرمایہ کاری کے دعوے فراڈ ہیں‘حافظ نعیم الرحمن

حافظ نعیم نے کہا کہ اگر ہمیں اسلام آباد میں داخلے سے روکا گیا تو ہمارے پاس پلان بی اور سی موجود ہیں، ہم کسی سیاسی جماعت کے ساتھ نہیں بلکہ عوام کے ساتھ اتحاد کر چکے ہیں اور انہیں کے ساتھ مل کر دھرنا دیں گے۔ ہم اسلام آباد جلاؤ گھیراؤ یا گولی کے لیے نہیں، بلکہ اپنا حق لینے جا رہے ہیں۔

مزید پڑھیں: حکمرانوں کے اعلانات اور وعدوں پر اب کوئی بھی اعتبار نہیں کیا جا سکتا

حافظ نعیم الرحمان کا کہنا تھا کہ حکومت کہتی ہے کہ آئی ایم ایف راضی نہیں ہوا، لیکن گیس، بجلی، اور پیٹرول کی قیمتیں بڑھا دی گئی ہیں،آٹے، چینی اور دال پر ٹیکس لگا کر وزیراعظم کہتے ہیں کہ مہنگائی کم ہو گئی ہے۔ یہ ہمارا ملک ہے، فوج اور بیوروکریسی عوام سے ہیں۔ ہمیں کسی امپائر کی انگلی اٹھوانی نہیں، بلکہ عوام کا حق لینے جا رہے ہیں اور سب اداروں کو تعاون کرنا ہوگا، خواہ وہ اسلام آباد سے ہوں یا راولپنڈی سے۔