وزیراعلی خیبرپختونخوا نے کالاباغ ڈیم کی حمایت کردی

?️ 1 ستمبر 2025

پشاور (سچ خبریں) وزیراعلی خیبرپختونخوا علی امین گنڈاپور نے کالاباغ ڈیم کی حمایت کر دی۔

میڈیا سے گفتگو کرتے ہوئے انہوں نے کہا کہ صوبائیت کے چکر میں پاکستان کو نقصان نہیں پہنچا سکتا، تحفظات دور کرکے کالاباغ ڈیم جیسا منصوبہ بننا چاہیے۔ بارشوں سے صوبے کے کئی شہروں میں نقصانات ہوئے،بونیر، شانگلہ ، صوابی اور سوات بہت زیادہ متاثر ہوئے،12اور 14 فٹ کاسیلابی ریلاآیا جس نے گھروں کو زمین بوس کردیا۔

انہوں نے کہا کہ سیلابی صورتحال میں تمام ادارے متحرک رہے اور بھرپور کام کیا، 24 گھنٹوں میں تمام لوگوں تک پہنچ کر ریسکیو کیا گیا،سیلاب متاثرین کے تمام نقصانات کا ازالہ کر رہے ہیں،خیبرپختونخوا میں 490 افرادسیلابی ریلوں کی نذر ہوئے۔

سیلاب میں جاں بحق افراد کے لواحقین کو 20 ،20 لاکھ روپے دیئے گئے،مکمل تباہ ہونے والے گھروں کے مالکان کو10، 10 لاکھ روپے دیئے جارہے ہیں۔

اتنی تیزی سے سیلاب متاثرین کی بحالی کیلئے کام نہیں ہوا جتنا ہم نے کیا،اگر ہم نے وقت پر ڈیم بنائے ہوتے تو اتنا نقصان کبھی نہ ہوتا،ہم خیبرپختونخوا میں مزید ڈیم بنا رہے ہیں۔