اسرائیل میں انتخابات کے بعد خانہ جنگی چھڑنے کا خدشہ؛ صیہونی اخبار کا انتباہ

?️ 15 اکتوبر 2026

سچ خبریں:صیہونی اخبار ہارٹیز کے تجزیہ کار روگل آلفر نے خبردار کیا ہے کہ اگر بنیامین نیتن یاہو انتخابات میں شکست تسلیم نہ کریں اور دھاندلی کا الزام لگائیں تو اسرائیل میں سیاسی انتشار، خانہ جنگی اور ایران کے ساتھ نئی علاقائی جنگ کا خطرہ بڑھ سکتا ہے۔

صہیونی معاشرے میں گہری ہوتی تقسیم اور اندرونی و بیرونی بحرانوں کے تسلسل کے درمیان، اسرائیل کے آئندہ انتخابات کے حوالے سے عبرانی ذرائع ابلاغ میں مختلف تجزیے سامنے آ رہے ہیں۔ اسی تناظر میں عبرانی اخبار ہارٹیز نے اپنے معروف صہیونی تجزیہ کار روگل آلفر کے ایک تجزیہ  میں پیش گوئی کی ہے کہ انتخابی نتائج اسرائیل میں خانہ جنگی کی صورت حال پیدا کر سکتے ہیں۔

روگل آلفر نے بدھ کے روز شائع ہونے والے اپنے تجزیہ  میں لکھا کہ صیہونی انتخابات سے 2 ہفتے قبل ہی ملک کے بڑے ٹیلی ویژن چینلز کے اسٹوڈیوز میں اس بات پر بحث شروع ہو گئی ہے کہ انتخابات کے بعد کیا ہوگا، خصوصاً اگر رائے عامہ کے جائزوں کے نتائج درست ثابت ہوئے۔

انہوں نے مزید کہا کہ انتخابی سروے کے نتائج کئی سوالات کو جنم دیتے ہیں۔ کیا انتخابات دوسرے مرحلے تک پہنچیں گے؟ کیا صیہونی فوج کے سابق چیف آف اسٹاف گادی آئزنکوٹ، جو موجودہ وزیر اعظم بنیامین نیتن یاہو کے مدِمقابل ہیں، عرب جماعتوں کی بیرونی حمایت سے اقلیتی حکومت بنانے کی کوشش کریں گے، تاکہ نیتن یاہو کو اقتدار سے ہٹایا جا سکے؟

تجزیہ  میں مزید سوال اٹھایا گیا ہے کہ کیا مخالف جماعتیں کنیسٹ کے اسپیکر کو تبدیل کرکے نیتن یاہو کے خلاف قوانین منظور کروائیں گی؟ ان میں سب سے اہم ایسا قانون ہوگا جو مجرمانہ سرگرمیوں میں ملوث رہنے والے یا مقدمے کا سامنا کرنے والے کسی بھی شخص کو وزارتِ عظمیٰ کا منصب سنبھالنے سے روک دے۔

روگل آلفر نے اپنے تجزیہ  میں زور دیا کہ نیتن یاہو نے اپنے عوامی بیانات میں واضح اشارہ دیا ہے کہ اگر انتخابی نتائج ان کے حق میں نہ آئے تو وہ انہیں قبول نہیں کریں گے اور دھاندلی کا الزام عائد کریں گے۔ دوسری جانب، انتخابات کا دوسرے مرحلے تک پہنچنا بھی بے معنی ہوگا، کیونکہ ان کے بقول صیہونی صدر اسحاق ہرزوگ مفاہمت اور قومی اتحاد قائم کرنے کی صلاحیت نہیں رکھتے۔

اس صہیونی تجزیہ کار نے خبردار کیا کہ اس صورت حال میں وسیع پیمانے پر افراتفری پھیل سکتی ہے اور انتخابی نظام اقتدار کی پُرامن منتقلی کا ذریعہ نہیں رہے گا۔ ان حالات میں کہا جا سکتا ہے کہ اسرائیل خانہ جنگی کے دہانے پر پہنچ جائے گا۔

روگل آلفر نے طنزیہ انداز میں لکھا کہ اسرائیل میں 27 اکتوبر کو ہونے والے انتخابات کے اگلے دن کی تاریخ 28 اکتوبر نہیں ہوگی، بلکہ وہ 6 جنوری جیسا دن ہوگا۔ یہ وہ تاریخ ہے جب سابق امریکی صدر ڈونلڈ ٹرمپ کے حامیوں نے امریکی کانگریس کی عمارت پر حملہ کیا تھا۔

ان کے اس بیان کا اشارہ اس امکان کی جانب ہے کہ جس طرح 2020 کے امریکی صدارتی انتخابات میں شکست کے بعد ٹرمپ کے حامیوں نے کانگریس کی عمارت پر دھاوا بولا تھا، اسی طرح نیتن یاہو کی انتخابی شکست کے بعد اسرائیل میں بھی ایسا ہی منظر دہرایا جا سکتا ہے۔

اس تجزیہ کار نے ایک اور ممکنہ منظرنامے کا ذکر کرتے ہوئے کہا کہ ایران کے ساتھ جنگ کا ایک نیا دور بھی شروع ہو سکتا ہے۔ ایسی صورت میں صیہونی شہریوں کو دوبارہ پناہ گاہوں میں رہنے پر مجبور ہونا پڑے گا۔ ان کے مطابق، اس کا مطلب انتخابات کی ساکھ کو نقصان پہنچنا، نتائج کے حوالے سے اندرونی اتفاقِ رائے کا فقدان اور تیزی سے ایک نئی، وسیع علاقائی جنگ میں الجھ جانا ہوگا۔

انہوں نے مزید کہا کہ نیتن یاہو درحقیقت ایک نمائشی انتخابی عمل منعقد کرنا چاہتے ہیں، کیونکہ وہ صرف انہی نتائج کو قبول کریں گے جو ان کے ذاتی مفادات کے مطابق ہوں۔ اس لیے حقیقی اور شفاف انتخابات کی توقع نہیں رکھنی چاہیے۔

تجزیہ  کے اختتام پر زور دیا گیا ہے کہ نیتن یاہو کا منصوبہ ابتدا ہی سے یہی رہا ہے اور اب یہ سب کے سامنے آ رہا ہے: اگر وہ جیت گئے تو ان کے لیے یہ بہترین صورت حال ہوگی، لیکن اگر ہار گئے تو وہ دھاندلی کا الزام لگائیں گے۔ روگل آلفر کے مطابق، اس طرزِ عمل سے صیہونی معاشرے اور کابینہ کمزور ہوں گے اور نیتن یاہو اندرونی بحران سے نکلنے کے لیے ایک بار پھر علاقائی جنگ کا سہارا لے سکتے ہیں۔