طالبان کی عبوری کابینہ پر پاکستان کا رد عمل سامنے آگیا

🗓️ 9 ستمبر 2021

اسلام آباد (سچ خبریں) پاکستان کے ترجمان دفتر خارجہ نے کہا ہے کہ پاکستان، افغانستان میں بدلتی صورتحال کا قریب سے جائزہ لے رہا ہے، امید ہے کہ افغانستان میں نئے سیاسی انتظام کے تحت امن و استحکام اور سلامتی کو یقینی بنایا جائے گا، پاکستان پرامن، مستحکم، خود مختار اور خوشحال افغانستان کیلئے پرعزم ہے۔ تفصیلات کے مطابق پاکستان نے افغانستان میں عبوری حکومت کے قیام پر اپنے ردعمل میں کہا کہ توقع رکھتے ہیں کہ نئے افغان سیاسی سیٹ اپ کے تحت افغان عوام کی ترقی اور ضروریات کو پورا کیا جائے گا، افغانستان میں نئے سیاسی انتظام کے تحت امن واستحکام اور سلامتی کو یقینی بنایا جائے گا۔

افغانستان میں بدلتی صورتحال کا قریب سے جائزہ لے رہے ہیں۔مزید برآں وزیر خارجہ شاہ محمود قریشی نے وفاقی دارالحکومت اسلام آباد میں افغانستان کی صورتحال پر وزارتِ خارجہ میں چین، ازبکستان، ترکمانستان ،تاجکستان اور ایران کے وزراء خارجہ کی ورچوئل کانفرنس سے خطاب کرتے ہوئے کہا کہ ہم افغانستان کی تاریخ کے ایک اہم لمحے پر مل رہے ہیں،گذشتہ چند ہفتوں کے واقعات نے ہمارے خطے کو دنیا کی نگاہوں کا مرکز بنا دیا ہے،جس طرح صورتحال تبدیل ہو رہی ہے اس کے اثرات افغانستان, ہمارے خطے اور دنیا پر مرتب ہوں گے، کوئی بھی اتنی برق رفتاری سے افغان فورسز کی ناکامی اور افغانستان حکومت کے خاتمے کا نہیں سوچ سکتا تھا۔

افغانستان کے حوالے سے تمام تر اندازے اور تجزیے غلط ثابت ہوئے اہم بات یہ ہے کہ زیادہ خون خرابہ نہیں ہوا،ایسا لگتا ہے کہ تنازعہ اور خانہ جنگی کی صورتحال کو ٹال دیا گیا ہے،طالبان نے عبوری حکومت کا اعلان کردیا ہے ہم نے اس پیش رفت کو دیکھا ہے،ہمیں امید ہے کہ سیاسی صورتحال جلد ازجلد مستحکم ہوگی اور حالات بہتری کی طرف جائیں گے، واضح کرنا ہے افغان سرزمین کو کسی بھی ملک کے خلاف استعمال کرنے کی اجازت نہیں دی جانی چاہیے،ہمیں ایک متحد، خود مختاری اور جغرافیائی سالمیت کے حامل افغانستان کی مکمل حمایت کا اعادہ کرنا ہوگا۔