کراچی کی مخدوش عمارتیں گرانے کیلئے فوری وسائل دستیاب نہیں۔ وزیر بلدیات

?️ 18 جولائی 2025

کراچی (سچ خبریں) وزیر بلدیات سندھ سعید غنی نے کہا ہے کہ کراچی میں مخدوش قرار دی گئی 41 عمارتوں کو خالی کرا لیا گیا ہے لیکن مخدوش عمارتیں گرانے کیلئے فوری وسائل دستیاب نہیں ہیں۔

تفصیلات کے مطابق سعید غنی نے اپنے ایک بیان میں کہا ہے کہ مخدوش قرار دی گئی 41 عمارتوں کو خالی کرالیا گیا ہے جبکہ کچھ کو توڑا بھی گیا ہے، جن عمارتوں کو خالی کرایا گیا ان کے مکینوں کو 3 ماہ کا کرایہ دیا جائے گا۔

ذرائع کے مطابق وزیر بلدیات سندھ نے کہا ہے کہ ہمارے پاس اتنے وسائل نہیں کہ فوری طور پر ان عمارتوں کو گرایا جا سکے، عمارتیں خالی کرانا مشکل عمل ہے، مزاحمت کا سامنا کرنا پڑتا ہے، تعمیراتی اداروں کی تنظیم آباد اور انجینئرنگ کونسل کے ساتھ مل کر طویل مدتی لائحہ عمل بنا رہے ہیں۔

انہوں نے مزید کہا ہے کہ بعض اوقات ہمیں عدالتی فیصلوں کی وجہ سے بھی مشکلات کا سامنا کرنا پڑتا ہے کیونکہ غیر قانونی تعمیرات کے خلاف عدالتیں حکم امتناع دے دیتی ہیں، گزشتہ روز جس عمارت کی چھت گری وہ خطرناک عمارتوں میں شامل نہیں تھی۔