افغانستان بارے اجلاس میں عدم شرکت، سہیل آفریدی نے سیاسی پوائنٹ سکورنگ کی۔ عطا تارڑ

?️ 17 اکتوبر 2025

اسلام آباد (سچ خبریں) وفاقی وزیر اطلاعات عطاء اللہ تارڑ نے کہا کہ وزیراعظم شہباز شریف کی سربراہی میں افغان پناہ گزینوں اور ان کی واپسی کے حوالے سے اہم اجلاس میں شرکت نہ کر کے وزیراعلی خیبرپختونخوا نے سیاسی پوائنٹ سکورنگ کی۔

وزیر اطلاعات عطا اللہ تارڑ کا میڈیا سے خصوصی گفتگو کرتے ہوئے کہنا تھا کہا کہ اجلاس میں تمام متعلقہ اداروں اور صوبوں کی نمائندگی موجود تھی، وزرائے اعلی میں سے صرف سہیل آفریدی اجلاس میں موجود نہیں تھے، ان کی نمائندگی مزمل اسلم نے کی۔ وزیر اطلاعات نے کہا کہ صوبے کے امن و امان سے متعلق اجلاس میں وزیراعلی کی موجودگی ضروری تھی، اجلاس میں افغان پناہ گزینوں کی واپسی کے حوالے سے اہم فیصلے کئے گئے۔

انہوں نے کہا کہ وزیراعلی خیبر پختونخوا اجلاس میں بیٹھ کر بات چیت کرنے پر یقین نہیں رکھتے، غزہ اور فلسطین کے معاملے پر پاکستان نے اپنا کردار ادا کیا ہے۔ عطا اللہ تارڑ نے کہا کہ وزیراعظم پاکستان نے غزہ، فلسطینیوں کے لئے ہر موقع پر آواز اٹھائی ہے، اللہ تعالی کا فضل ہے کہ ہماری خارجہ پالیسی کامیابی سے جا رہی ہے۔

وزیر اطلاعات کا کہنا تھا کہ معرکہ حق کے بعد پاکستانیوں کو بہت سنجیدگی سے لیا جا رہا ہے، حکومتی اقدامات سے سبز پاسپورٹ کے وقار میں اضافہ ہوا ہے۔

انہوں نے کہا کہ عوام نے ٹی ایل پی اور تحریک انصاف کی احتجاج کی کال کو مسترد کر دیا ہے، بے مقصد احتجاج کی کالوں کا نتیجہ یہی نکلتا ہے، ملک بھر میں کاروبار زندگی رواں دواں ہے۔