ہم نے دنیا کی جانب سے دہشت گردی کے خلاف جنگ لڑی ہے:شامی وزیرخارجہ

?️ 9 ستمبر 2022

سچ خبریں:شام کے امور خارجہ اور پناہ گزینوں کے وزیر فیصل مقداد نے اس بات پر زور دیا کہ دمشق نے پوری دنیا کی جانب سے عالمی دہشت گردی کا مقابلہ کیا اور اپنی انسانی، اقتصادی اور سماجی توانائیوں کی غیر معمولی قیمت ادا کی۔

شام کے وزیر خارجہ فیصل مقداد نے نیویارک میں اقوام متحدہ کے ہیڈکوارٹر میں منعقد ہونے والی دہشت گردی کے متاثرین سے متعلق عالمی کانفرنس کے افتتاحی موقع پر اپنے ویڈیو خطاب میں کہا کہ دہشت گردی کے متاثرین کی مدد کے لیے اقوام متحدہ کے پروگراموں کے باوجود شام کو اس سے لڑنے کے لیے کوئی حمایت حاصل نہیں ہے اور نہ ہی کوئی امداد اس جنگ کے متاثرین اور ان کے اہل خانہ کو حاصل ہوئی ہے بلکہ اس کے برعکس پورے شامی عوام دوسرے ممالک کی طرف سے مسلط کردہ اقتصادی ناکہ بندی کا شکار ہیں۔

انہوں نے وضاحت کی کہ شام دہشت گرد گروہوں جیسے کہ داعش، النصرہ فرنٹ، القاعدہ اور دیگر دہشت گرد گروہوں کے خلاف سب سے پرتشدد دہشت گردانہ جنگوں میں سے ایک کا نشانہ بنا ہے جس میں دسیوں ہزار افراد شہید ہوئے ہیں اور اس کے بعد لاکھوں لوگوں کی نقل مکانی اور انفراسٹرکچر اور سرکاری و نجی املاک کی تباہی کے علاوہ آج یہ ملک خوفناک معاشی نقصانات سے دوچار ہے جسے دنیا کا کوئی ملک برداشت نہیں کر سکتا۔