چین یوکرین بحران کے حل کے لیے تمام فریقوں کے ساتھ تعاون کرنے کو تیار

🗓️ 27 اپریل 2023

سچ خبریں:روس میں چین کے سفیر نے کہا کہ چین یوکرین کی بحرانی صورتحال کے حل کے لیے تمام فریقوں کے ساتھ تعاون کرنے کے لیے تایر ہے۔
روس میں چین کے سفیر ژانگ ہان وی نے کہا کہ چین یوکرین کی بحرانی صورتحال کے حل کے لیے تمام فریقوں کے ساتھ تعاون کرنے کو تیار ہے،انہوں نے اس بات پر زور دیا کہ چین یوکرین کی بحرانی صورتحال کو حل کرنے کے لیے تمام فریقوں کے ساتھ قریبی رابطے میں ہے۔

ہان وی نے مزید کہا کہ ہم سمجھتے ہیں کہ سب سے پہلے جنگ بندی کا قیام ضروری ہے،تمام تنازعات کو سفارتی طریقے سے حل کیا جانا چاہیے، تاہم جنگ بندی کے قیام کے لیے یوکرین کو ہتھیاروں کی سپلائی روکنا ضروری ہے اس لیے کہ آگ کو پانی سے بجھانا چاہیے نہ کہ مزید لکڑیوں سے اس لیے کہ اس طرح جنگ کے شعلے مزید بھڑکیں گے۔

چین کا کہنا ہے کہ ہم تمام فریقوں کے ساتھ قریبی رابطے اور تعاون کے لیے تیار ہیں اور ہم اس تنازعہ کو حل کرنے کے لیے امن مذاکرات کے انعقاد کے لیے مشاورت پر مبنی اپنی مشترکہ کوششوں کو آگے بڑھائیں گے۔

انہوں نے کہا کہ چین یوکرین کے تنازع کے پرامن حل کی حمایت کرتا ہے جو بات چیت کے ذریعے ممکن ہوگا ،البتہ ہم یورپ میں سلامتی کے مسئلے کو الگ نہ کرنے کے معاملے پر اصرار کرتے ہیں،کسی یورپی ملک میں دوسرے ممالک کے سلامتی کے مفادات کی قیمت پر سلامتی قائم کرنا ناممکن ہے۔

دریں اثناء یورپی یونین میں چینی وفد کے سربراہ فو کانگ نے ایک انٹرویو میں کہا کہ یورپ کو چین اور روس کے تعلقات کا صحیح اندازہ لگانا چاہیے اور بغاوتوں اور سازشوں سے چوکنا رہنا چاہیے نیز ان کے سامنے ہتھیار نہیں ڈالنا چاہیے۔