سچ خبریں: شمالی غزہ کے ایک علاقے پر صیہونی بمباری سے ایک ہی خاندان کے 44 افراد شہید اور 6 زخمی ہوگئے۔
اسرائیلی لڑاکا طیاروں نے غزہ کے شمال میں جبالیا کیمپ میں متعدد رہائشی مکانات پر بمباری کی جس کے نتیجہ میں شہاب خاندان کے 44 افراد شہید اور 6 زخمی ہوگئے۔
یہ بھی پڑھیں: صیہونی جنگی جرائم
فلسطین الیوم ویب سائٹ کے مطابق غزہ کی وزارت صحت نے اعلان کیا کہ بمباری سے قبل اہل خانہ کو کوئی وارننگ نہیں دی گئی،شہداء میں سے 23 افراد کی عمریں 18 سال سے کم ہیں جبکہ 10 کی عمریں سات سال سے کم ہیں،زخمیوں میں ایک دو سالہ بچہ بھی شامل ہے۔
حماس کے انفارمیشن آفس کے سربراہ سلامہ معروف نے بھی اناطولیہ خبر رساں ایجنسی کو بتایا کہ اسرائیلی حکومت نے گذشتہ ہفتہ سے اب تک غزہ میں فلسطینی خاندانوں کے خلاف تقریباً 30 جرائم کا ارتکاب کیا ہےجس کے نتیجہ میں سینکڑوں شہید ہوئے ہیں۔
غزہ میں فلسطین کی وزارت صحت نے بھی اعلان کیا ہے کہ غزہ پر صہیونی فضائی حملوں میں شہید ہونے والوں کی تعداد 1417 ہو گئی ہے۔
اس رپورٹ کے مطابق 6268 افراد زخمی ہوئے ہیں جن میں سے نصف شہداء خواتین اور بچے ہیں،اب تک 447 بچے اور 248 خواتین شہید ہو چکی ہیں۔
اس سلسلے میں صیہونی فوج کے ترجمان نے کہا کہ اس حکومت کی فضائیہ نے گذشتہ چھ دنوں میں غزہ کے عوام پر چار ہزار ٹن وزنی تقریباً چھ ہزار بم گرائے ہیں۔
مزید پڑھیں: غزہ کے خلاف صیہونی وحشی پن
انہوں نے کہا کہ اس عرصے کے دوران حماس کے کمانڈ، انتظامی اور بنیادی ڈھانچے کے مراکز سمیت 3600 سے زائد مقامات کو حملوں کا نشانہ بنایا گیا ہے۔
البتہ انہوں نے سیکڑوں رہائشی مکانات پر بے مقصد بمباری اور خواتین اور بچوں کے قتل کا ذکر نہیں کیا جسے کسی بھی طرح فوجی ہدف نہیں سمجھا جاتا۔
