سچ خبریں:انسانی حقوق کی حمایت کرنے والے ڈاکٹروں کی تنظیم نے اپنی ایک رپورٹ میں فلسطینیوں کے خلاف صیہونی حکومت کے جرائم کے حوالے سے صہیونی ڈاکٹروں کی یونین کی غیر انسانی خاموشی پر تنقید کرتے ہوئے کہا ہے کہ یہ یونین منظم طریقے سے فلسطینی عوام کو صحت اور حفاظت کے حق سے محروم کر رہی ہے۔
مڈل ایسٹ مانیٹر ویب سائٹ کی رپورٹ کے مطابق ڈاکٹرز فار ہیومن رائٹس جو امریکہ کی ایک غیر منافع بخش تنظیم ہے، نے ڈاکٹرز کی بین الاقوامی سنڈیکیٹ کے پاس اسرائیلی میڈیکل ایسوسی ایشن کے خلاف شکایت درج کرائی اور شن بیٹ کی طرف سے فلسطینیوں پر تشدد میں اسرائیلی ڈاکٹروں کے کردار کی نشاندہی کی ۔
اسرائیل میڈیکل ایسوسی ایشن مقبوضہ فلسطین میں ڈاکٹروں کی ٹریڈ یونین ہے، اس غیر منافع بخش تنظیم نے اپنی شکایت میں کہا ہے کہ اسرائیل میڈیکل ایسوسی ایشن نے اس ایسوسی ایشن کو پیش کی گئی دستاویزات کو نظر انداز کیا، جس سے ظاہر ہوتا ہے کہ غزہ پٹی سے بیمار بچوں کو علاج کے لیے پٹی سے باہر بھیجنے کے معاملات میں، بچوں کے والدین کو ساتھ جانے کی اجازت سے انکار کیا گیا۔
واضح رہے کہ یہ شکایت مقامی اور بین الاقوامی تنظیموں سے جمع کیے گئے مضبوط اور ٹھوس شواہد پر مشتمل ہے جو یہ ثابت کرتی ہے کہ اسرائیل میڈیکل ایسوسی ایشن نے صیہونی حکومت کی فوج کی جارحیت کے حق میں کارروائی کرتے ہوئے فلسطینیوں کے صحت کے حق کے تحفظ کے لیے اپنے فرائض کی بارہا خلاف ورزی کی ہے۔