حماس کی فلسطینیوں کو مسجد اقصیٰ پہنچنے اور صیہونیوں کا مقابلہ کرنے کی دعوت

🗓️ 26 مئی 2022

سچ خبریں:فلسطینی تحریک حماس نے ایک بیان جاری کیا ہے جس میں فلسطینیوں کو مسجد اقصیٰ میں پہنچنے اور صیہونیوں کا مقابلہ کرنے کی دعوت دی گئی ہے۔
فلسطین کی اسلامی مزاحمتی تحریک حماس کے ترجمان نے ایک بیان جاری کیا جس میں فلسطینیوں سے اگلے اتوار کو مسجد اقصیٰ میں پہنچنے اور اسرائیل کے زیر قبضہ بستیوں میں رہنے والے آبادکاروں کا مقابلہ کرنے کی اپیل کی ہے۔

محمد حمادہ نے کہا کہ فلسطینیوں کا فرض ہے کہ وہ صہیونی دشمن اور غاصب آباد کاروں کے مذموم منصوبوں کو ناکام بنانے اور ہر جگہ ان کا مقابلہ کرنے کے لیے مسجد اقصیٰ میں بڑی تعداد میں اکھٹے ہوں، حمادہ نے کہا کہ ہمارے اور صیہونی دشمن کے درمیان جنگ جاری ہے اور مزاحمتی تحریک صیہونی آبادکاروں کی کسی بھی حماقت اور جارحیت کا منہ توڑ جواب دینے کے لیے تیار ہے۔

انہوں نے واضح کیا کہ مسجد اقصیٰ نے دشمن پر واضح کر دیا کہ مسجد اقصی ایک سرخ لکیر ہے اور یہ ایک طے شدہ اور غیر تبدیل شدہ اصول ہے نیز قابضین کی مسجد اقصیٰ میں کوئی جگہ نہیں ہے، حماس کے ترجمان نے زور دے کر کہا کہ فلسطینی عوام کسی بھی حالت میں مسجد الاقصی کی توہین کی اجازت نہیں دیں گے اور آباد کاروں کے پرچم مارچ کی مخالفت کریں گے نیز دشمن کو مسجد اقصیٰ پر نئی حقیقتیں مسلط کرنے کی اجازت نہیں دیں گے۔