جہاد اسلامی کے ایک اور کمانڈر شہید

?️ 14 مئی 2023

سچ خبریں:صہیونی فوج نے اعلان کیا کہ شاباک فورسز کے ساتھ مشترکہ آپریشن کے دوران جہاد اسلامی تحریک کے آپریشنز ڈیپارٹمنٹ کے سربراہ ایاد الحسنی کو مغربی غزہ میں قتل کر دیا گیا ہے۔

اناطولیہ خبر رساں ایجنسی کی رپورٹ کے مطابق صہیونی فوج نے غزہ کی پٹی میں جہاد اسلامی کے ایک اعلیٰ فوجی کمانڈر کو شہید کر دیا، رپورٹ کے مطابق اسرائیلی فوج نے ایک بیان میں کہا کہ حفاظتی دستوں کے ساتھ ایک مشترکہ آپریشن میں انہوں نے جہاد اسلامی کے کمانڈر عیاد الحسنی کو ہلاک کر دیا ہے۔

بیان میں مزید کہا گیا ہے کہ الحسنی نے غزہ کی پٹی میں جنگ کے انتظام میں اہم کردار ادا کیا تھا اور خلیل البہتینی کا عہدہ سنبھالا تھا، جو منگل کو ایک فوجی آپریشن میں مارے گئے تھے،اس بیان میں مزید کہا گیا ہے کہ الحسنی جنگی انتظام میں اہم شخصیت تھے اور اس حوالے سے اہم فیصلے کرتے تھے۔

صہیونی فوج نے اعلان کیا کہ الحسنی جہاد کمان کے مواصلاتی شعبے کے انچارج تھے اور غزہ کی پٹی کی تمام تنظیموں سے رابطے میں تھے نیز صیہونی بستیوں اور مقبوضہ علاقوں کی طرف راکٹ اور بھاری میزائل داغنے سے متعلق تمام فیصلوں میں وہ شامل ہوتے تھے۔

قبل ازیں فلسطینی وزارت صحت نے اعلان کیا تھا کہ النصر محلے میں رہائشی عمارت پر بمباری کے نتیجے میں 2 فلسطینی شہید اور 5 زخمی ہوئے ہیں،الحسنی کی شہادت کے جواب میں جہاد اسلامی تحریک نے اعلان کیا کہ وہ اسرائیل کو سخت جواب دے گی۔