امریکی خزانے میں سعودی اثاثوں میں کمی

🗓️ 22 جولائی 2022

سچ خبریں:مختلف ذرائع کے مطابق مئی میں امریکی خزانے میں سعودی عرب کے اثاثوں میں ایک ارب ڈالر کی کمی ہوئی۔
سعودی اخبار عکاظ کی رپورٹ کے مطابق اپریل کے مقابلے مئی میں امریکی ٹریژری میں سعودی عرب کے بانڈز میں 1 بلین ڈالر کی کمی واقع ہوئی ہے،الخلیج آن لائن کے مطابق اس اخبار نے اعلان کیا کہ مئی 2022 میں امریکی ٹریژری بانڈز میں سعودی عرب کے اثاثے کم ہو کر 114.7 بلین ڈالر رہ گئے، جو اپریل 2022 کے مقابلے میں 1 بلین ڈالر کی کمی ہے۔

اخبار عکاظ کے مطابق سعودی عرب کے اثاثوں میں کمی کے بعد یہ ملک مئی میں امریکی بانڈز رکھنے والوں میں 16ویں نمبر پر آگیا جبکہ مارچ میں سعودی عرب کے پاس امریکی خزانے کی ملکیت 115.5 بلین ڈالر تک گر گئی۔

یاد رے کہ سعودی عرب، جو جنوری 2021 کے آخر میں امریکی بانڈز کا 17 واں سب سے بڑا ہولڈر تھا، فروری میں کمی کے بعد 18 ویں نمبر پر آگیا، فروری 2022 تک، سعودی عرب کے پاس طویل مدتی بانڈز کے 101.27 بلین ڈالر اور قلیل مدتی امریکی بانڈز کے 15.46 بلین ڈالر تھے۔

واضح رہے کہ گزشتہ مئی میں امریکی خزانے میں سعودی عرب کی سرمایہ کاری بانڈز میں 99.32 بلین ڈالر تھی، ایسا اس وقت ہوا جبکہ سعودی عرب میں مہنگائی کی شرح مئی 2022 میں سالانہ 2.2 فیصد بڑھی، اشیائے خورد و نوش کی قیمتوں اور ٹرانسپورٹیشن کی قیمتوں میں اضافہ صارفین کی قیمتوں میں اضافے کی بنیادی وجہ ہے۔