سچ خبریں:اسپوٹنک نیوز ایجنسی کی رپورٹ کے مطابق شام کے ایک سکیورٹی ذرائع نے بتایا کہ دمشق کے جنوبی اور مغربی محلوں کے باشندوں نے ملک کے جنوبی حصے میں راکٹ فائر کیے جانےکی آواز کو واضح طور پر سنا، ذرائع نے یہ بھی بتایا کہ اسرائیلی جنگی طیاروں نے جنوبی علاقے میں شامی فوج کے اڈے پر متعدد میزائل داغے، ذرائع نے بتایا کہ صہیونی حکومت کے میزائل مقبوضہ علاقوں کی فضا سے فائر کیے گئے تھے تاہم شامی فوج کے فضائی دفاع نے دشمن کے میزائلوں کو روکا اور ان میں سے بیشتر کو مارگرایا۔
واضح رہے کہ اسرائیلی جارحیت داعش کے دہشت گرد گروہ کے ممبروں نے ملک کے وسط میں واقع حما اور حمص کے صحراؤں کے درمیان فوجی اڈوں پر پرتشدد حملہ کے کچھ ہی گھنٹوں بعد ہوئی، اس دہشت گردانہ حملے کے نتیجے میں ، شامی فوج کی اتحادی افواج کے سات اہلکار ہلاک ہوگئے ، ادھر بدھ کی شام پانچ زخمیوں کی ہلاکت کے بعد ، ہلاک ہونے والوں کی تعداد 12 ہوگئی، دریں اثنا ، شامی آبزرویٹری برائے ہیومن رائٹس نے القونیطرہ کے نواح میں اسرائیلی فضائی حملے کی اطلاع دی جس میں شامی حکومت کے فوجی اڈوں کو نشانہ بنایا گیا، شامی آبزرویٹری برائے انسانی حقوق نے ابھی تک ان فضائی حملوں کے نتیجے میں کسی جانی نقصان کی اطلاع نہیں دی ہے۔
