ایکس پر پابندی کے بارے میں عظمیٰ بخاری کا بیان

?️ 3 اگست 2024

سچ خبریں: پنجاب کی وزیر اطلاعات عظمیٰ بخاری نے کہا ہے کہ ہم سوشل میڈیا کے خلاف نہیں ہیں لیکن ہم قواعد و ضوابط کی بات کر رہے ہیں اور جب قوانین بن جائیں گے تو ایکس پر پابندی ختم ہو جائے گی۔

لاہور ہائیکورٹ کے باہر میڈیا سے گفتگو کرتے ہوئے عظمیٰ بخاری نے کہا کہ بانی پی ٹی آئی جیل میں رہ کر ذہنی طور پر پریشان ہو گئے ہیں،ایک طرف وہ کہہ رہے ہیں کہ فوج اپنا نمائندہ مقرر کرے اور دوسری طرف کہہ رہے ہیں کہ محسن نقوی فوج کا نمائندہ ہے۔

یہ بھی پڑھیں: ’فیس بک، ٹک ٹاک، انسٹا گرام، ایکس اور یوٹیوب پر پابندی لگائی جائے‘

انہوں نے کہا کہ بانی پی ٹی آئی کی کوئی خواہش پوری نہیں ہوگی اور نہ ہی کوئی ان کی خواہشات پوری کرنے کو تیار ہے، لیکن خواب دیکھنے پر کوئی پابندی نہیں، انہیں خواب دیکھنے دیں۔

انہوں نے کہا کہ بانی پی ٹی آئی پہلے معافی مانگیں، یہ تسلیم کریں کہ انہوں نے یہ سب کیا، غلطی ہوئی، پہلے آگ لگا دیں اور پھر معافی مانگ لیں، ایسا نہیں ہوتا۔

سوشل میڈیا قوانین کے بارے میں وزیر اطلاعات نے کہا کہ ہم سوشل میڈیا کے خلاف نہیں ہیں، بلکہ ہم قواعد و ضوابط کی بات کر رہے ہیں۔

انہوں نے مزید کہا کہ متعدد ممالک میں سوشل میڈیا کے لیے قوانین موجود ہیں اور ہر ملک میں مسائل کے حل کے لیے قوانین بنائے جاتے ہیں، آزادی بیان کا غلط استعمال ہوتا ہے اور ہمارے معاشرے میں بگڑی ہوئی روایات ہیں۔

انہوں نے مزید کہا کہ پوری دنیا میں سوشل میڈیا اکاؤنٹس کو ریگولیٹ کیا جاتا ہے۔ ڈیجیٹل دہشتگردی سوشل میڈیا اکاؤنٹس کے ذریعے کی جاتی ہے، قوانین بن جائیں تو ایکس پر پابندی ختم ہو جائے گی اور تمام اکاؤنٹس قواعد و ضوابط کے تحت چلنے چاہئیں۔

عظمیٰ بخاری نے سولر پروگرام کے بارے میں کہا کہ 100 سے 200 یونٹ والے صارفین کو سولر فراہم کریں گے اور 200 سے 500 یونٹ تک کے صارفین کو بھی سولر دیں گے۔

مزید پڑھیں: ’ایکس‘ پر پابندی ختم کی جائے، خواجہ سعد رفیق

انہوں نے کہا کہ ہمیں عوام کی تکالیف کا احساس ہے، نواز شریف نے آئی ایم ایف سے جان چھڑا دی تھی، لیکن اب آئی ایم ایف کی پاکستان کے لیے سخت شرائط ہیں جنہیں ہم بھگت رہے ہیں۔