کل ملک بھر میں پیٹرول نہیں ملے گا

?️ 24 نومبر 2021

اسلام آباد (سچ خبریں) پاکستان پٹرولیم ڈیلرز ایسوسی ایشن نے مارجن میں اضافہ نہ کئے جانے پر 25 نومبر سے ملک گیر ہڑتال کا اعلان کرتے ہوئے کہا ہے کہ ہڑتال کے دوران صرف ایمبولنسز کو پٹرول فراہم کیا جائے گا۔پٹرولیم ڈیلرز ایسوسی ایشن کا کہنا ہے کہ 25 نومبر صبح 6 بجے سے ملک بھر میں پیٹرول پمپس بند رہیں گے۔گلگت بلتستان اور آزاد کشمیر میں بھی پٹرول پمپس بند رہیں گے۔
ایسوسی ایشن کے ترجمان نے کہا ہے کہ کم منافع کے مارجن پر پٹرول فروخت کرنے پر ہڑتال کی کال دی ہے کیونکہ ہمارے پاس ہڑتال کے علاوہ کوئی راستہ نہیں ،حکومت ہمارے مطالبات کی 17 نومبر کی ڈیڈ لائن کو پورا کرنے میں ناکام رہی ہے۔ اس سے قبل چیئرمین پیٹرولیم ڈیلرز ایسوسی ایس عبدالسمیع خان نے مارجن نہ بڑھانے کی صورت میں 5 نومبر کو ملک میں پیٹرول پمپس بند رکھنے کا اعلان کیا تھا۔
عبدالسمیع خان کے مطابق حکومت نے ڈیلرز کے کمیشن میں اضافے کی یقین دہانی کرائی تھی لیکن اس پر عمل نہیں ہوا۔بعد ازاں وفاقی وزیر حماداظہر سے چیئرمین پاکستان پیٹرولیم ڈیلر ایسوسی ایشن نے وفد کے ہمراہ ملاقات کی جس میں حکومت نے پیٹرولیم ڈیلرز کو مارجن بڑھانے کی یقین دہانی کرادی تھی جس کے بعد پیٹرولیم ڈیلرز ایسوسی ایشن کی جانب سے ہڑتال 17 نومبر تک موخر کردی گئی تھی۔
دوسری جانب جمعرات سے ملک بھر میں پٹرول پمپس مالکان کی ہڑتال کے باعث کھلے عام پٹرول فروخت کرنیوالے ڈیلرز نے پٹرول ذخیرہ کرنا شروع کردیا ہے جبکہ لوگ بھی بڑی تعداد میں پمپس پر پٹرول ڈلواتے نظر آرہے ہیں۔ پٹرول پمپس مالکان نے اپنی کمیشن بڑھانے کیلئے حکومت سے مذاکرات کئے تھے حکومت کی جانب سے 17نومبر تک کی ڈیڈ لائن مانگی تھی مگر حکومت نے اس پر کوئی جواب نہ دیا جس پر پٹرولیم ڈیلرز ایسوسی ایشن نے 25نومبر سے ملک گیر ہڑتال کرنے کا اعلان کیا تھا۔