پاکستان کی کابل  حملے کی شدید الفاظ میں مذمت

🗓️ 9 مئی 2021

اسلام آباد(سچ خبریں) افغانستان کے دارالحکومت کابل میں ایک  اسکول کے قریب ہونے والے بم دھماکوں پر پاکستان نے ردعمل کا اظہار کرتے ہوئے  شدید الفاظ میں مذمت کی ہے،حملے میں جاں بحق ہونے والے  افراد کی تعداد 55 اور  زخمیوں کی تعداد 150 ہوگئی ہے، جاں بحق اور  زخمیوں میں زیادہ تر طالبات شامل ہیں۔

ترجمان دفتر خارجہ کا اپنے ایک بیان میں کہنا تھا کہ پاکستان کابل میں اسکول کے باہر ہونے والے حملے کی شدید مذمت کرتا ہے، پاکستان دہشتگردی کے خلاف جدو جہد میں افغانستان کے ساتھ ہے۔ کابل حملے پر مختلف ممالک کی جانب سے بھی مذمت کاا ظہار کیا جارہا ہے۔

ترجمان دفتر خارجہ نے یہ بھی کہا کہ پاکستانی حکومت اور عوام افغان حکومت اور عوام کے ساتھ دلی تعزیت کرتے ہیں۔اُن کا کہنا تھا کہ ہم سانحہ میں زخمی ہونے والوں کی جلد صحت یابی کے لیے دعاگو ہیں۔

دوسری جانب غیر ملکی میڈیا کا بتانا ہے کہ اسکول پر کار بم حملے میں جاں افراد کی تعداد 55 اور  زخمیوں کی تعداد 150 ہوگئی ہے، جاں بحق اور  زخمیوں میں زیادہ تر طالبات شامل ہیں۔ افغان صدر اشرف غنی نے سیدالشہدا اسکول پرحملے میں طالبان کو ملوث قراردیا ہے جبکہ طالبان کے ترجمان ذبیح اللہ مجاہد کی جانب سے الزام کی سختی سے تردیدکرتے ہوئے حملے کی مذمت کی گئی ہے۔

خیال رہے کہ گزشتہ روز  کابل میں اسکول کے قریب بم دھماکوں میں طالبات سمیت درجنوں افراد جاں بحق ہوگئے تھے، یہ دھماکے ایسے وقت ہوئے ہیں جب افغانستان سے امریکی افواج طویل جنگ کے بعد واپس روانہ ہو رہی ہیں۔