وزیر تعلیم کا پاکستان اور ترکی کے مابین دوطرفہ تعلقات مزید مستحکم بنانے پر زور

?️ 18 مارچ 2021

اسلام آباد(سچ خبریں)وفاقی وزیر برائے تعلیم شفقت محمود نے پاکستان اور ترکی کے مابین دوطرفہ تعلقات مزید مستحکم بنانے پر زور دیتے ہوئے کہا ہے کہ پاکستان اور ترک عوام کے مابین کلیدی محبت بھرے تعلقات ہیں، ‎دنیا میں اگر کوئی انتہائی قرب رکھنے والے ممالک ہیں تو وہ پاکستان اور ترکی ہیں۔

ترک قومی دن کی تقریب سے خطاب کرتے ہوئے شفقت محمود نے کہا کہ ‎چناکلے معرکہ، نئے جدید ترکی کی بنیاد بنا، ترک قوم فخر، بہادری، جرات، فتح اور کامیابیوں کے تسلسل کی علامت بن کر ابھری۔انہوں نے کہا کہ ‎پوری مسلم امہ کیلئے مضبوط تر ترکی انتہائی اہمیت کا حامل ہے ، ‎قوموں کی زندگی میں شاعری نے انقلابی کردار ادا کیا، شاعر مشرق علامہ محمد اقبال کی شاعری تحریک پاکستان کی روح تھی۔

شفقت محمود نے کہا کہ قائداعظم کی قیادت میں عوامی جدوجہد ڈاکٹر علامہ محمد اقبال کی شاعری کے طفیل آگے بڑھی، ترک شاعرمہمت عاکف ارسوئے نے بھی ترک قوم کیلئے علامہ اقبال جیسا کردارادا کیا۔انہوں نے کہا کہ ‎امید ہے پاکستان اور ترکی کے مابین دوطرفہ برادرانہ تعلقات کا مضبوط رشتہ مزید مستحکم ہوگا۔

واضح رہے کہ پاکستان اور ترکی دونوں دیرینہ دوست ہیں اور ان کے آپسی تعلقات ہمیشہ اچھے رہے ہیں، پاکستان میں حکومت کسی کی بھی ہو اس کے ترکی کے ساتھ تعلقات ہمیشہ خوش گوار رہے ہیں۔ تجارت سے لے کر فوجی تربیت اور فوجی معاہدوں تک دونوں ممالک ایک دوسرے پر انحصار کرتے ہیں۔ پاکستان میں کئی شاہراہیں کمال اتا ترک کے نام پر ہیں جبکہ ترکی کی اہم مصروف شاہراہ جناح جادیسی پاکستان کے بانی محمد علی جناح کے نام پر ہے۔

پاکستان کے سابق فوجی آمر اور سابق صدر جنرل (ر) پرویز مشرف نے تو اپنی ترکی میں ایک لمبے عرصے تک تعلیم حاصل کی تھی۔ ترک جمہوریہ کے بانی کمال اتا ترک تو ان کے آئیڈیل تھے۔ اسی طری موجودہ وزیرِ اعظم عمران خان بھی کمال اتا ترک کے ترکی ماڈل کا ذکر کئی مرتبہ کر چکے ہیں۔