وزارتوں کے معاملے پر پی پی اور ن لیگ میں اختلافات سامنے آ گئے

?️ 16 اپریل 2022

اسلام آباد(سچ خبریں)حکومتی اتحاد میں وزارتوں کے معاملے پر اختلافات سامنے آ گئے۔پیپلز پارٹی نے داخلہ اور قانون کے قلمدان مانگ لیے۔اے آر وائی نیوز کی رپورٹ کے مطابق داخلہ اور قانون کی وزارت پر پیپلز پارٹی اور ن لیگ میں اختلاف ہو گیا۔ذرائع نے بتایا کہ پیپلز پارٹی نے رات گئے داخلہ اور قانون کی وزارتیں بھی مانگ لیں۔

نوازشریف نے دونوں میں سے ایک وزارت پیپلز پارٹی کو دینے کی تجویز دی۔جس کے بعد احسن اقبال کو منصوبہ بندی و ترقیات اور راناثناء اللہ کو وزارت قانون کی جگہ کوئی دوسری وزارت دینے پر غور شروع ہو گیا۔

رپورٹ کے مطابق پیپلز پارٹی نے شازیہ مری کو بھی وزارت دینے کا مطالبہ کیا۔خیال رہے کہ اس سے قبل پاکستان پیپلزپارٹی نے صدر، اسپیکر اور چیئرمین سینیٹ کے عہدے میں دلچسپی ظاہر کی تھی جب کہ مسلم لیگ ن کی طرف سے پی پی پی کو وزارتیں لینے پر آمادہ کیا جارہا تھا ، پیپلزپارٹی کے رہنماؤں کی اکثریت نے وزارتوں کو الیکٹورل الائنس سے مشروط کرنے کی رائے دیتے ہوئے کہا تھا کہ کم از کم 15 نشستوں پر انتخابی الائنس ہو تو پھر وزارتیں لی جائے تاہم پاکستان پیپلزپارٹی چیئرمین بلاول بھٹو زرداری نے وزارتوں اورانتخابی الائنس دونوں کی مخالفت کی تھی۔

ادھر نئی حکومت کی وفاقی کابینہ کی تشکیل کے معاملے پر وزیر اعظم شہباز شریف نے پی ڈی ایم جماعتوں کے سربراہان کو آج افطار پر بلا لیا ، وزیر اعظم کی جانب سے افطار ڈنر کا اہتمام وزیرا عظم ہاوس میں کیا جائے گا جہاں وزیر اعظم شہباز شریف پی ڈی ایم جماعتوں کے سربراہان کا ان کی حمایت پر شکریہ ادا کریں گے اور نئی کابینہ سے متعلق اتحادیوں سے مشاورت کےبعد حتمی شکل دی جائے گی، وفاقی کابینہ کے ناموں کا اعلان آج رات تک متوقع ہے۔