بجلی کی قیمتوں میں پھر سے اضافے کا امکان

?️ 31 جنوری 2022

اسلام آباد ( سچ خبریں)مہنگائی سے پریشان عوام کے لئے ایک اور بری خبر سامنے آئی ہے کہ  بجلی کی قیمتوں میں 3 روپے 12 پیسے فی یونٹ اضافے کا امکان ظاہر کردیا گیا ہے۔اضافہ ہونے پر صارفین پر 30 ارب سے زائد اضافی بوجھ پڑے گا۔پٹرولیم مصنوعات کی قیمتوں میں بھی بڑے اضافے کا امکان ہے۔

ذرائع کے مطابق سنٹرل پاور پرچیزنگ ایجنسی کی جانب سے دسمبرکے ماہانہ فیول ایڈجسٹمنٹ کی مد میں بجلی کی قیمتوں اضافہ کی درخواست دی گئی ، جس میں کہا گیا ہے کہ دسمبر2021 میں 8 ارب 52 کروڑیونٹ بجلی پیدا ہوئی جب کہ بجلی کی پیداوارلاگت 73 ارب 84 کروڑروپے رہی ، 22 روپے 24 پیسے میں فرنس آئل سے مہنگی ترین بجلی پیدا کی گئی ۔

ایل این جی سے 17 روپے 80 پیسے فی یونٹ میں بجلی پیدا ہوئی ، 14 روپے 8 پیسے فی یونٹ میں ڈیزل سے بجلی پیدا ہوئی ، کوئلے سے بجلی کی پیداواری لاگٹ 13 روپے 31 پیسے فی یونٹ میں ہوئی ، اسی طرح ایران سے 13 روپے 26 پیسے فی یونٹ میں بجلی درآمد کی گئی۔بتایا گیا ہے کہ نیپرا کی جانب سے سنٹرل پاور پرچیزنگ ایجنسی کی درخواست پر کل سماعت کی جائے گی ، جس کے بعد اضافے کی صورت میں صارفین پر30 ارب سے زائد اضافی بوجھ پڑے گا۔

ادھر پٹرولیم مصنوعات کی قیمتوں میں بھی بڑے اضافے کا امکان ہے ، جس کے لیے اوگر نے نئی سمری تیار کر لی ہے ، یکم فرروی سے پٹرولیم مصنوعات کی قیمتوں میں فی لیٹر 10 روپے تک اضافے کا امکان ہے ، پٹرول پانچ روپے 85 پیسے فی لیٹر مہنگا کرنے کی سفارش کی گئی ہے ، مٹی کا تیل 10 روپے فی لیٹر مہنگا کرنے کی تجویز دی گئی ہے جب کہ لائٹ ڈیزل کی قیمت میں 9 روپے 17 پیسے فی لیٹر اضافے کی تجویز دی گئی ہے۔

اوگرا کی جانب سے تجویز کردہ نئی قیمتوں کی منظوری وزیراعظم خان آج دیں گے ، جس کے بعد پٹرولیم مصنوعات کی نئی قیمتوں کا اطلاق یکم فروری سے ہو گا ، جس کے لیے وزارت خزانہ پٹرولیم مصنوعات کی قیمتوں میں اضافے کا حتمی نوٹیفیکیشن جاری کرے گی۔