جارج فلائیڈ کے قاتل امریکی پولیس افسر کو 22 سال 6 مہینے قید کی سزا سنا دی گئی

?️ 26 جون 2021

واشنگٹن (سچ خبریں)  امریکا میں سیاہ فام جارج فلائیڈ قتل کیس میں امریکی عدالت نے سفید فام سابق پولیس اہلکار کو 22 سال 6 مہینے قید کی سزا سنا دی ہے۔

تفصیلات کے مطابق مئی 2020 میں مینیپولیس میں افریقی نژاد امریکی شخص جارج فلائیڈ کے قتل کے لیے مجرم قرار دیے جانے والے سابق امریکی پولیس افسر کو 22 سال اور چھ ماہ قید کی سزا سنائی گئی ہے۔

جج نے کہا کہ ڈریک شاوین کی سزا آپ کی جانب سے اعتماد اور اختیار کی حامل پوزیشن کے غلط استعمال پر مبنی ہے، اور خاص طور پر جس طرح مسٹر فلائیڈ کے لیے سفاکی دکھائی گئی۔

واضح رہے کہ سیاہ فام امریکی جارج فلائیڈ کے قتل کا واقعہ مئی 2020 میں پیش آیا تھا، جس کی ویڈیو میں دیکھا جاسکتا تھا کہ پولیس اہلکار نے فلائیڈ کی گردن کو اپنے گھٹنے سے بہت زور سے دبا رکھا تھا، جارج فلائیڈ بار بار یہ کہہ رہے تھے کہ ان کی سانس بند ہورہی ہے لیکن پولیس افسر نے ان کی باتوں پر توجہ نہیں دی جس کے بعد ان کی موت واقع ہوگئی۔

ڈیرک چاون نے فلائیڈ کی گردن پر 8 منٹ 46 سیکنڈ تک گھٹنے ٹیکے رکھے، طبی معائنہ کاروں کی رپورٹ کے مطابق 3 منٹ بعد فلائیڈ بے ہوش ہوکر اس دنیا سے چلے گئے تھے۔

جارج فلائیڈ کی یہ فوٹیج منظر عام پر آنے کے بعد امریکہ سمیت دنیا بھر بھر میں نسل پرستی کے خلاف کئی دن تک مظاہرے کیے گئے تھے۔