غزہ پر شدید صیہونی فضائی حملے، چند گھنٹوں میں 29 فلسطینی شہید

?️ 31 جنوری 2026

سچ خبریں:غزہ پر صیہونی فضائی حملوں میں شدت آ گئی، چند گھنٹوں کے دوران کم از کم 29 فلسطینی شہید اور درجنوں زخمی ہو گئے، جن میں بڑی تعداد بچوں کی ہے۔

غزہ پر صیہونی حملوں میں شدت آ گئی ہے اور آج صبح سے اب تک ان حملوں میں 29 فلسطینی شہید ہو چکے ہیں۔

الجزیرہ نیوز چینل کی رپورٹ کے مطابق طبی ذرائع نے بتایا ہے کہ آج غزہ کی پٹی پر صیہونی فوج کے حملوں میں شہداء کی تعداد اب تک 29 تک پہنچ چکی ہے۔

یہ بھی پڑھیں:غزہ میں جنگ بندی کی مسلسل خلاف ورزی 

ان میں سے 14 افراد شہرِ غزہ میں شہید ہوئے۔ شہداء میں بڑی تعداد بچوں کی بتائی جا رہی ہے۔ غزہ کے محلہ شیخ رضوان میں پولیس مرکز پر بمباری کے نتیجے میں ہی 13 افراد شہید ہوئے، جن میں متعدد پولیس اہلکار اور سروس کے لیے آنے والے شہری شامل تھے۔

ایک اسپتال ذرائع نے بتایا کہ شہرِ غزہ کے مغربی علاقے النصر پر صیہونی حملوں میں تین افراد شہید ہوئے۔ ذرائع کے مطابق اب بھی کچھ افراد ملبے تلے دبے ہوئے ہیں۔

غزہ کی پٹی میں واقع اسپتال شہداء الاقصیٰ نے اعلان کیا کہ آج 12 شہداء اور درجنوں زخمیوں کو اسپتالوں میں منتقل کیا گیا ہے۔

اسپتال کے ترجمان نے کہا کہ اسرائیل کسی بھی انسانی ضابطے کی پابندی نہیں کر رہا اور غزہ میں کوئی طبی سامان داخل نہیں ہونے دیا گیا۔

انہوں نے زور دے کر کہا کہ 20 ہزار سے زائد مریض ایسے ہیں جنہیں غزہ سے باہر علاج کی ضرورت ہے جبکہ زیادہ تر شہری نہایت خراب صحت اور صفائی کی صورتحال میں زندگی گزار رہے ہیں۔

ادھر غزہ کی وزارتِ صحت نے اعلان کیا کہ گزشتہ 48 گھنٹوں کے دوران 17 شہداء کو اس علاقے کے اسپتالوں میں لایا گیا۔

اسی دوران ہلال احمر غزہ کے ترجمان نے شدید طبی سہولیات کی کمی کی نشاندہی کرتے ہوئے عالمی برادری سے انسانی حقوق کی خلاف ورزیوں کو روکنے اور غزہ کی گزرگاہیں کھولنے کے لیے دباؤ ڈالنے کا مطالبہ کیا۔

مزید پڑھیں:غزہ میں نسل کشی پر پردہ ڈالنے پر مغربی میڈیا کو معافی مانگنی چاہیے:حماس

دوسری جانب غزہ کی ریسکیو ٹیموں نے بتایا کہ مغربی خان یونس میں قائم غیث کیمپ میں صیہونی فضائی حملوں کے بعد بے گھر افراد کے خیموں میں آگ لگ گئی۔ شمالی خان یونس کے علاقے المواصی میں تقریباً دس لاکھ افراد جمع ہیں جس کے باعث امدادی کارروائیاں انتہائی مشکل ہو گئی ہیں۔