ہونڈوراس میں صدارتی انتخابات میں کانٹے کی ٹکر

?️ 3 دسمبر 2025

ہونڈوراس میں صدارتی انتخابات میں کانٹے کی ٹکر

ہونڈوراس میں صدارتی انتخابات کے نتائج تاحال غیرحتمی ہیں کیونکہ 57 فیصد ووٹوں کی گنتی کے بعد دائیں بازو اور لبرل امیدوار تقریباً برابر دکھائی دے رہے ہیں اور دونوں کے درمیان صرف 500 سے کچھ زیادہ ووٹوں کا فرق ہے۔ نتائج کے اعلان میں تعطل اور نتائج کے ابتدائی نظام کی معطلی نے شکایات اور خدشات کو جنم دیا ہے۔

خبر رساں ایجنسی افے کے مطابق قومی انتخابی کونسل نے بتایا ہے کہ 57 فیصد ووٹوں کی گنتی کے بعد قدامت پسند نیشنل پارٹی کے امیدوار نصری آسفورا نے 7 لاکھ 49 ہزار 22 ووٹ یعنی 39.91 فیصد حاصل کیے ہیں، جبکہ ان کے حریف لبرل امیدوار سالوادور نصراللہ کو 7 لاکھ 48 ہزار 507 ووٹ ملے، جو 39.89 فیصد بنتے ہیں۔ دونوں کے درمیان فرق صرف 515 ووٹ کا ہے۔

قومی انتخابی کونسل کی سربراہ آنا پاؤلا ہال نے کہا کہ ابتدائی نتائج کے انتقال کے نظام (TREP) نے 50 فیصد سے زائد ووٹوں کی گنتی مکمل کرلی ہے، تاہم باقاعدہ اور تفصیلی گنتی کونسل کی ویب سائٹ پر جاری رہے گی۔ ان کا کہنا تھا کہ دونوں امیدواروں کے درمیان اس قدر معمولی فرق کے باعث صبر اور سکون کے ساتھ بقیہ مراحل کی تکمیل کا انتظار ضروری ہے۔ ان کے مطابق مراحل اوّل اور دوم کے بعد خصوصی بازشماری کا عمل بھی ہوگا جس کے بعد ہی حتمی نتائج مرتب کیے جائیں گے۔

ہال نے کہا کہ TREP کا مقصد کم وقت میں ابتدائی معلومات فراہم کرنا ہے تاکہ شہریوں میں بےچینی کم ہو اور انتخابی نتائج کی شفافیت برقرار رہے، تاہم اس نظام کی معطلی پر بعض حلقوں نے اعتراضات اٹھائے ہیں۔ حکمران جماعت "آزادی و بازسازی” کے بائیں بازو کے امیدوار رکسی مونکادا نے انتخابات سے قبل ہی دھاندلی کا الزام لگاتے ہوئے کہا تھا کہ نتائج سات نجی کمپنیوں کی جانب سے "جوڑے توڑے” گئے ہیں، جس سے ووٹرز میں شکوک پیدا ہوگئے ہیں۔

انتخابی تجزیہ کار اوزیریس پایس نے وضاحت کی کہ TREP ایک جامع نظام ہے جو اسکیننگ، خودکار شناخت، انسانی نگرانی میں تصحیح اور خفیہ کردہ ڈیٹا کی منتقلی پر مشتمل ہے، اور اس کے کسی بھی حصے میں خرابی کی صورت میں پورے عمل کی ساکھ متاثر ہوسکتی ہے۔

قومی انتخابی کونسل کے پاس قانون کے مطابق انتخابات کے بعد حتمی نتائج جاری کرنے کے لیے 30 دن کا وقت ہے۔