امریکہ کے ساتھ کسی بھی فوجی تنازع کے لیے تیار ہیں:شمالی کوریا

?️ 29 جولائی 2022

سچ خبریں:شمالی کوریا کے رہنما نے کہا کہ پیانگ یانگ امریکہ کے ساتھ کسی بھی فوجی تنازع کے لیے پوری طرح تیار ہے۔
رشیا ٹودے کی رپورٹ کے مطابق شمالی کوریا کے رہنما کم جونگ اُن نے اپنے جنوبی پڑوسی کو دھمکی دی تھی کہ پیانگ یانگ کے خلاف خطرناک مہم جوئی کی صورت میں اس کی فوج کو تباہ کر دیا جائے گا، رپورٹ کے مطابق شمالی کوریا کے رہنما نے کوریائی جنگ کے خاتمے کی 69ویں سالگرہ کے موقع پر منعقدہ تقریب میں کہا کہ ہم جنوبی کوریا کی حکومت کو خبردار کرتے ہیں کہ کسی بھی خطرناک مہم جوئی کی صورت میں ہم اس کی فوج کو تباہ کر دیں گے۔

انہوں نے مزید کہا کہ اگر جنوبی کوریا کی حکومت اور اس کے فوجی دستے ہمارے خلاف فوجی کارروائی کرنے کا سوچ رہے ہیں اور یہ سمجھتے ہیں کہ وہ مخصوص فوجی تنصیبات یا طریقوں کی بنیاد پر ہماری فوجی طاقت کے ایک حصے کو محدود یا تباہ کر سکتے ہیں تو وہ غلط سوچ رہے ہیں۔

ساتھ ہی شمالی کوریا کے رہنما نے مزید کہا کہ پیانگ یانگ امریکہ کے ساتھ کسی بھی فوجی تنازع کے لیے پوری طرح تیار ہے، یاد رہے کہ پیانگ یانگ اس سے قبل بھی دھمکی دے چکا ہے کہ اگر امریکہ اور جنوبی کوریا نے مشترکہ فوجی مشقوں سمیت اپنی دشمنانہ کارروائیاں بند نہ کیں تو انہیں غیر معمولی سکیورٹی چیلنجز کا سامنا کرنا پڑے گا۔