امریکہ بہت بڑے سائبر حملے کا شکار

?️ 1 اگست 2021

سچ خبریں:امریکہ نے اپنے کچھ عدالتی اداروں پر حالیہ دنوں میں بڑے پیمانے پرہونے والے سائبر حملوں کا اعتراف کیا ہے۔
ہل نیوز ایجنسی کی رپورٹ کے مطابق امریکہ نے اعلان کیا ہے کہ اس کے کچھ عدالتی اداروں کو بڑے سائبر حملوں کا نشانہ بنایا گیا ہے، اس خبر کا اعلان امریکی محکمہ انصاف نے کیا اور اس سلسلے میں کہا گیا کہ ایک بڑے سائبر حملے میں جو حال ہی میں اس ملک کے مختلف اداروں اور پراسیکیوٹر کے دفاتر کے خلاف کیا گیا ، بہت سے اداروں کو ہیک کر لیا گیا، کہا جاتا ہے کہ ان سائبر حملوں کی شدت اتنی زیادہ ہے کہ اس کے طول و عرض بتدریج ظاہر ہو رہے ہیں۔

امریکی محکمہ انصاف نے کہا کہ یہ حملہ گزشتہ سال ہوا تھا انہوں نے مزید کہا کہ ہیکرز نےتمام ای میلز اور ان کے اٹیچمنٹ سمیت ڈیٹا چوری کر لیا،رپورٹ کے مطابق حالیہ سائبر حملے میں 15 امریکی ریاستوں میں 27 پراسیکیوٹر دفاتر کے علاوہ کولمبیا اور نیو یارک کے دائرہ کار میں کام کرنے والے ملازمین کی ای میلز ہیکرز استعمال کرتے تھےجبکہ صرف نیو یارک میں 80 فیصد پراسیکیوٹر کے دفاتر کے ملازموں کے ای میلز چوری ہو گئے۔

واضح رہے کہ امریکہ پر تازہ ترین سائبر حملہ ایک ماہ سے بھی کم عرصہ پہلے ہوا جب مائیکرو سافٹ نے اعلان کیا کہ امریکہ میں 150 سے زائد سرکاری ایجنسیوں ، تھنک ٹینکوں اور دیگر اداروں کو نشانہ بنایا گیا ہے، اس وقت یہ بھی بتایا گیا تھا کہ نوبیلیم نامی ایک ہیکنگ گروپ نے مختلف تنظیموں کے 3 ہزار ای میل اکاؤنٹس پر حملہ کیا جن میں سے بیشتر امریکہ کے تھے۔