افغانستان میں طالبان کےستارے گردش میں

?️ 3 اپریل 2021

سچ خبریں:افغان فوج نے مختلف صوبوں میں  زمینی اور فضائی کاروائیوں میں کم از کم 77 طالبان دہشتگردوں کو ہلاک کیا ہے۔
افغانستان کی طلوع نیوز ایجنسی کی رپورٹ کے مطابق اس ملک کی وزارت دفاع نے اعلان کیا ہے کہ قندھار ، بغلان ، لغمان ، فاریاب اور بدخشان صوبوں میں جھڑپوں اور فضائی حملوں میں طالبان کے 77 ارکان ہلاک اور متعدد زخمی ہوگئے ہیں، وزارت نے ہفتے کے روز ایک بیان میں کہا ہے کہ آرمی فورسز نے صوبہ قندہار کے ارغنداب میں طالبان کے ایک جلسے کو نشانہ بنایا تھا ، جس میں اس گروپ کے 18 افراد ہلاک اور ایک کار بم دھماکہ ناکاراہ بنا دیا گیا تھا۔

بیان میں کہا گیا ہے کہ اس گروہ کے 13 دستی بموں کو بھی ناکارہ کردیا گیا، رپورٹ کے مطابق افغان فوج کے اسپیشل آپریشنز ڈویژن کی جانب سے ایک الگ بیان میں کہا گیا ہے کہ گذشتہ رات فورسز نے صوبہ بدخشان کے شہر ناسی میں ایک آپریشن کیاجس میں طالبان کو بھاری جانی نقصان پہنچا،بیان کے مطابق ، 18 طالبان ارکان کی لاشیں میدان جنگ میں موجود ہیں اور صوبے کے بڑے حصوں کو طالبان سے آزاد کرالیا گیا ہے۔

افغانستان کی وزارت دفاع کے مطابق فاریاب میں 26 ، لغمان میں چھ اور بغلان میں نو طالبان ہلاک ہوئے جبکہ متعدد زخمی ہوئے ہیں۔