پاک فضائیہ کا تربیتی طیارہ گر کر تباہ ہو گیا

?️ 22 ستمبر 2021

مردان (سچ خبریں) پاک فضائیہ کا تربیتی طیارہ معمول کی پرواز کے دوران مروان کے قریب  گر کر تباہ ہوگیا، واقعے کی وجوہات جاننے  اور تحقیقات کے لئے اعلیٰ سطحی بورڈ تشکیل دے دیا گیا ہے۔تاہم زمین پر کسی قسم کے جانی و مانی نقصان کی اطلاع نہیں ملی فی الحال ریسکیو اور سرچ آپریشن جاری ہے۔

تفصیلات کے مطابق ترجمان پا ک فضائیہ کی جانب سے جاری کردہ بیان میں بتایا گیاہے کہ پاک فضائیہ کا تربیتی طیارہ معمول کی پرواز کےدوران مردان کے قریب گر کر تباہ ہوا ، زمین پرکسی قسم کےجانی ومالی نقصان کی اطلاع نہیں ملی، واقعے کے فوری بعد ریسکیو اور فائر بریگیڈ کا عملہ جائے وقوع پر پہنچ گیا اور ریسکیو اور سرچ آپریشن جاری ہے۔

ترجمان کا کہنا ہے کہ واقعے کی وجوہات جاننے کے لئے ائیرہیڈکوارٹرز نے اعلیٰ سطح بورڈ تشکیل دے دیا ہے۔یاد رہے گذشتہ ماہ پاک فضائیہ کا لڑاکا تربیتی طیارہ اٹک کے قریب گر کر تباہ ہوگیا تھا، تاہم دونوں پائلٹ جہاز سے بحفاظت اترنے میں کامیاب رہے تھے۔

خیال رہے گذشتہ سال یوم پاکستان کی ریہرسل کے دوران پاک فضائیہ کا لڑاکا طیارہ ایف – 16 گر کر تباہ ہوگیا تھا ، طیارہ حادثے میں ونگ کمانڈرنعمان اکرم شہید ہوئے تھے۔بعد ازاں اپریل میں پاک فوج کامشاق طیارہ گجرات کےقریب گرکرتباہ ہوگیا تھا ، حادثے کے نتیجے میں دونوں پائلٹ میجرعمر اور لیفٹیننٹ فیضان شہید ہوگئے تھے۔