الازہر کا یمن میں جنگ کے خاتمے کے لیے ثالثی پر پھر زور، فوری امن کمیٹی کے قیام کا مطالبہ

?️ 26 اکتوبر 2026

سچ خبریں:شیخ الازہر نے ایک بار پھر بیان جاری کرتے ہوئے اختلافات کے حل، ثالثی اور خطے میں امن و مفاہمت کے قیام کے لیے فوری کمیٹی تشکیل دینے کی ضرورت پر زور دیا ہے۔

الازہر کے سربراہ شیخ احمد الطیب نے اپنے ایک بیان میں یمن کی جنگ کے خاتمے کے لیے ثالثی سے متعلق اپنی تجویز کا اعادہ کرتے ہوئے کہا ہے کہ جامعہ الازہر کو اب بھی امید ہے کہ جلد از جلد کشیدگی میں کمی اور ثالثی کے لیے ایک کمیٹی تشکیل دی جائے گی، جس میں امتِ اسلامی کے بزرگوں اور دانشوروں میں سے امن پسند نمائندے شامل ہوں گے۔

بیان میں کہا گیا ہے کہ مذکورہ کمیٹی کو فوری طور پر بحرانوں اور بھڑکتے ہوئے تنازعات کو کم کرنے اور دین و امتِ اسلام کے پیروکاروں کے درمیان موجود اختلافات کے خاتمے کے لیے اقدامات کرنے چاہییں۔ یہ اختلافات خطے کے ممالک کی سلامتی اور استحکام کے لیے خطرہ بن رہے ہیں۔

شیخ احمد الطیب نے کہا کہ ان کوششوں کا مقصد عربوں اور مسلمانوں کی طاقت اور خودمختاری کا تحفظ، امت کے افراد کا خون بہنے سے روکنا اور اقوام کے وسائل و اثاثوں نیز آنے والی نسلوں کے حقوق کی حفاظت ہونا چاہیے۔

دوسری جانب احمد الطیب نے سعودی حکام کے اس دعوے کو قبول کرتے ہوئے کہ یمنی مسلح افواج نے مقدس شہروں مکہ مکرمہ اور مدینہ منورہ پر حملے کیے ہیں، ان حملوں کی شدید مذمت کی۔

انہوں نے مقدس مقامات کی حرمت پامال کرنے یا سعودی عرب کی سلامتی اور اس کے شہریوں اور زائرین کی حفاظت کو خطرے میں ڈالنے والے کسی بھی اقدام کی سخت مخالفت کا اعادہ کیا۔