بنیامین نیتن یاہو اسرائیل کے لیے خطرہ قرار،صہیونی تحریک کا سخت بیان

بنیامین نیتن یاہو اسرائیل کے لیے خطرہ قرار، صہیونی تحریک کا سخت بیان

 مقبوضہ فلسطین میں سیاسی کشیدگی شدت اختیار کر گئی ہے اور مختلف صہیونی تحریکوں اور سیاسی کارکنوں نے وزیر اعظم بنیامین نیتن یاہو کے خلاف تنقید کا نیا سلسلہ شروع کر دیا ہے۔ ناقدین نے انہیں ایک خطرناک آمر قرار دیتے ہوئے کہا ہے کہ ان کی پالیسیاں اسرائیل کے وجود کے لیے سنگین خطرہ بن چکی ہیں۔

اطلاعات کے مطابق حکومت مخالف صہیونی تحریک “تحول اسرائیل” نے وزیر اعظم بنیامین نیتن یاہو پر سخت تنقید کرتے ہوئے الزام عائد کیا کہ وہ ذاتی مفادات اور اپنی سیاسی بقا کو قومی سلامتی پر ترجیح دے رہے ہیں۔ تحریک نے اپنے بیان میں کہا کہ وزیر اعظم اپنے خلاف جاری عدالتی مقدمات سے بچنے کے لیے اہم قومی معاملات کو داؤ پر لگا رہے ہیں۔

بیان میں کہا گیا کہ جو شخص سنگین قانونی مقدمات میں گھرا ہو، اسے اسرائیل کے مستقبل سے متعلق فیصلہ کن اقدامات کا اخلاقی یا عوامی اختیار حاصل نہیں ہونا چاہیے۔ تحریک کے مطابق اسرائیلی عوام میں یہ تشویش بڑھ رہی ہے کہ حکومتی فیصلے قومی مفاد کے بجائے ذاتی مفادات کی بنیاد پر کیے جا رہے ہیں۔

مخالفین کا کہنا ہے کہ بنیامین نیتن یاہو اس انداز میں طرزِ حکومت اپنا رہے ہیں جیسے کابینہ، کنیسٹ (پارلیمنٹ)، عدالتی نظام اور سکیورٹی اداروں کی کوئی حیثیت باقی نہ رہی ہو۔ بیان کے اختتام پر تحریک نے انہیں نااہل اور خطرناک حکمران قرار دیتے ہوئے کہا کہ وہ اسرائیل کے لیے ایک حقیقی وجودی خطرہ بن چکے ہیں۔

واضح رہے کہ حالیہ ہفتوں کے دوران اسرائیل کے اندر سیاسی اختلافات اور عوامی احتجاج میں نمایاں اضافہ دیکھنے میں آیا ہے، جبکہ حکومت مخالف حلقے وزیر اعظم بنیامین نیتن یاہو کے خلاف مسلسل سخت بیانات جاری کر رہے ہیں۔